Республикын образований да науко министерствыштыже Марий Элыште Россельхозбанкын филиалжым виктарыше команде дене паша вашлиймаш лийын.
Тушто агрокласс-влакым почмо шотышто пырля пашам ыштыме дене кылдалтше йодышлам каҥашеныт, «Я в Агро» цифр платформо нерген каласкаленыт. Тиде платформо – школышто тунемше, студент да педагог-шамычлан шинчымашым пуышо ресурс. Тудын полшымо дене кызытсе агротехнологий, профилян вузыш тунемаш пурымо нерген пален налаш, ямде урок ден методический материалым муаш, тыгак ик эн йодмашан ялозанлык профессий-влак дене палдарыше вебинарым ончаш лиеш.
«Россельхозбанкын тыгай йӧным ыштымыжлан кӧра регионыштына агрообразованийлан вияҥаш кугу амал лиеш манын ӱшанем», – палемден Марий Эл образований да науко министр Лариса Ревуцкая.
Ушештарена, республикысе школлаште кызытлан 8 агрокласс уло. Тудын деч посна эше 11 тунемме верыште йоча-влакым ялозанлык технологий дене ешартыш образованийым пуымо кышкарыште палдарат.Ялозанлык да кочкыш сату министерстве дене пырля «Аграрно-промышленный комплексыште кадр» Курыкмарий район Микрӓк школышто агроклассым почмо дене кылдалтше паша ышталтеш. 2027 ийлан Марий Элыште 38 тыгай классым почаш палемдыме.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
