Шорык
Шушаш ий илышын чыла шӧрыныштыжӧ гаяк кугу вашталтышым сӧра. Те утларак чолга да чулым лийыда. Вий-куатым арам огыл, а иктаж-мом ыштышашлан кучылташ темлалтеш. Лектышыжат лиеш – у проектда-влакым кӱкшын аклат. Тӱрлӧ шотышто экспериментым эртарен кертыда. Тӱрыс налмаште, идалыкда куандарыше лиеш.
Презе
Шонымашке да кугу кӱкшытыш шуаш манын, тыланда «розовый очки» манмым кораҥдаш темлалтеш. Тыгодым сай ончыкылыклан ӱшаным йомдарыман огыл. Комаголя тыланда ятыр оҥай сюрпризым сӧра. Тӱҥ вашталтышыже йӧратымаш шотышто лиеш. Пӱрымаш тыланда карьер тошкалтыш дене кӱзымашым ямдыла.
Йыгыр
Шушаш ийыште шканда ятыр уым почыда, шуко оҥайым пален налыда. Южо йодыш шотышто чот тургыжланаш амал лекмылан кӧра поро кумылан айдеме гыч шылтален-мыскылен ойлаш йӧратышыш савырнен кертыда. Тыгай койышда воктеныда улшо-влаклан йӧршынат огеш келше. Пуалтше йӧным чын кучылт мошташ тунемман.
Рак
Тендам илышын чыла гаяк шӧрыныштыжат куанле тат-влак вучат. Физический пашам ыштыше-шамычын шийвундышт икымше пелийыштак палынак ешаралтеш. Кредитым налаш, окса «пирамидылашке» ушнаш огеш темлалт. Кокымшо пелыште кугурак должностьыш куснен кертыда. Комаголя идалык тыланда кугу ойгым огеш кондо.
Лев
Кӱлешан ошкылым ыштыме годым тыланда вашкыман огыл, уке гын могай-гынат йоҥылыш лийын кертеш. Комаголя «кугу» еҥ-влак дене кылым ышташ полша. У пашашке куснаш, илышым вашталташ кумылда лектеш гын, лӱдын ида шого. Тыге гына ончыко каен кертыда. Еҥ-шамыч дене чӱчкыдын ӱчашыме деч шкем кучен моштыман.
Ӱдыр
2020 ий 1 январь гыч тендан йӧршеш вес, у илыш тӱҥалеш. Комаголя чыла нелылык нерген мондаш да яндар лаштык гыч куанле илышым тӱҥалаш полша. Тыгодым мо тыланда эн чот кӱлеш, мом эн ончыко шындеда – рашемдыман. Ешыште сай кылым арален кодышаш верч тыршыман. Шкет Ӱдыр-влаклан Шӱдыр-шамыч мужыраҥаш темлат.
Виса
Шушаш ийыште вучыдымо ятыр вашталтыш лиеш. Ыштен шуктыдымым идалык тӱҥалтыште мучашлыман. Кокымшо пелийыште поснак чолга лияшда логалеш. У еҥ-влак дене палыме лийме путырак кугу пайдам конден кертеш. Сандене нимогай кылым ӧрдыжкӧ шӱкалман огыл. Тыге гына тендам пиалан идалык вучаш тӱҥалеш.
Скорпион
Тыланда 2020 ий чот кугу вашталтышым сӧра. Але марте ятыр нелылыкым вашлийында да нуным кӱлеш семын сеҥен лектында. Комаголя тыланда оксадам ятырлан ешараш, йӧратымаш кылым саемдаш полша. Лишыл еҥ-влак дене жапым шукырак эртараш тыршыман. Уке гын кылда тунар локтылалтеш – тӧрлаташ чот неле лиеш.
Пикшызе
Тыландат але марте тунаре чыташ логалын – ынде тӱрлӧ нелылыкымат кырча-марча семын веле аклаш тӱҥалыда. Шӱдыр-влак шуко окса толмым сӧрат, тыгодым тынар шукак пытарашдат логалеш манын палдарат. Южышт шке бизнесым тӱҥалын, илыме верым, эсогыл элым вашталтен кертыт. Кугешнаш йӧратыме койышдам пытараш темлалтеш.
Ирказа
Шушаш ийыште тыланда нимоат куштылгын огеш пуалт. Шонымашке шуаш манын, чотак тыршаш, пашам шуко ышташ логалеш. Январьыште ончыкылан планым ышташ тарванеда. Тӱрлӧ нелылыклан ямде лийза. Чыла еҥын ойлымыжлан ӱшаныман огыл, уке гын паша деч посна але шкетын шинчен кодын кертыда.
Вӱд йоктарыше
Тендам шушаш ийыште тӱрлӧ оҥай паша ден сомыл вучат. Кыртмен тыршыме тазалыкымат лунчыртен кертеш, сандене тидымат шарныман. Моло шотышто тургыжланаш амал огеш лий гаяк. Кокымшо пелий поснак куан ден пиалым сӧра. Идалык мучаште каналташ, вес элыш але иктаж ойыртемалтше верыш миен толаш йӧн лектеш.
Кол
Комаголя ий тыланда шуко йӧным сӧра. Пашаште кугу кӱкшытыш шуыда. Шкет Кол-влакым у йӧратымаш кыл вуча – вес шӱмбелым вашлийыда, ятыр оҥай еҥ дене палыме лийыда. Тыланда идалык мучко кугу тӱткышым ойыраш тӱҥалыт. Вожылмо да аптыраныме нерген мондыман. Сеҥымашке шуаш палемдыман да илыш корно дене вуйым кӱшкӧ нӧлтен ошкылман!
Л.КАМАЛЕТДИНОВА
