21-23 августышто Морко районысо Коркатово лицейыште военно-патриотический слёт эртен. Тушко Морко кундемысе военно-патриотический ушем да юнармейский отряд-влак чумыргеныт. Мероприятийым почмаште республикын молодёжный политике, спорт да туризм министржын алмаштышыже С.Игошин, Морко район вуйлатышын алмаштышыже А.Васильев, Юнармий штабын начальникше А.Мухачёв лийыныт.
Кум кечыште тунемше-влак салтак илышым «тамленыт». Строй дене каеныт, вооружений выставкым онченыт. Тыгак ончыкылык салтак-шамыч автоматым рончен-погеныт, утарыме пашаш ушненыт, сӧй пасум эртеныт, а пытартыш кечын военно-спортивный эстафетыште вийыштым тергеныт. Тушто икымше верым Коркатово лийцей икымше верым, Шиньша кыдалаш школы кокымшым, Морко посёлкысо 1-ше №-ан школ кумшо верым налыныт.
Тыгай сынан мероприятий ты кундемыште икымше гана ок эртаралт. Мутлан, тений шошым республикысе патриотический воспитаний да спорт рӱдер ты кундемысе военно-патриотический ушем-шамычын вуйлатышыштлан «Изирак командир-влакын школышт» мероприятийым эртарен.
– Ме тунам кадет, юнармеец, курсант-шамычлан подразделений дене кузе пашам ышташ кӱлмым умылтаренна. Тӱҥ шонымашнаже – военно-патриотический клуб, рӱдер-влакын вуйлатышыштым туныкташ, ты пашам республикыште кӱлеш семын вораҥдарен колташ, – ойла республикысе сборный пунктышто военный службыш контракт почеш служитлаш каяш еҥ-влакым налме сомылым шуктышо Борис Салдаев. – А эртыше кечылаште эртаралтше слёт кугурак класслаште тунемше ӱдыр-ден рвезе-влаклан, поснак ончыкылык салтак лияш шонышо-шамычлан пайдале.
Е.Эшкинина.
