13 июньышто Марий Эл вуйлатыше Александр Евстифеев РФ правительстве председательжын алмаштышыже Виталий Муткон эртарыме селекторный совещанийыш ушнен.
Тушто илыме верым чоҥымо отрасльын у финансирований механизмыш куснымыж нерген йодышым видеоконференций йӧн дене каҥашеныт.
— Те паледа, 1 июль гыч ме, эскроу счет-влакым кучылтын, проектный финансированийыш куснымо шотышто кугу реформым илышыш шыҥдараш тӱҥалына. Тудым йыжыҥын-йыжыҥын пуртышашлан Россий правительстве кӱлеш икмыняр ошкылым ыштен, — РФ субъект вуйлатыше-влаклан каласен Виталий Мутко.
Тудо долевой чоҥымашке ушнымо годым еҥ-влакын оксаштым аралаш кӱлеш манын палемден.
— Тыгодым эскерыше органын рольжым Россий Федерацийын субъектше шукташ тӱҥалеш, — каласен В.Мутко.
У бизнес-модель дене келшышын, дольщик-шамычын оксашт чоҥышо компаний-влакын счетышкышт колталтеш, но объект застройщик-влакын банк гыч налме кредитышт кӱшеш нӧлталташ тӱҥалеш. Еҥ-шамычын оксаштым нуно илыме верым собственностьыш пуымекышт гына налын кертыт. Объектын 30 процентлан ямде улмыж годым гына застройщик чоҥымо пашам ончычсо финансирований механизм почешак, эскроу счет деч посна, мучашлен кертеш.
Кызытсе жаплан Марий Элыште дольщик-влакын оксаштым кучылтын, 74 объект чоҥалтеш. Республикын Чоҥымаш, архитектур да илыме вер ден коммунал озанлык министерствыже Марий Эл кумдыкышто улшо чоҥымаш дене кылдалтше проект-влакын мониторингыштым эртарен. Тудын дене келшышын, объект-шамычым кум тӱшкалан шелаш ойым пидыныт. Икымше – тиде тугай проект-влак, кудышт финансированийым налыт да чоҥымо пашам умбакыже у механизм почеш шуят. Кокымшо тӱшкашке объектын 30 процентлан ямде улшо да чоҥымо пашам еҥ-влакын оксаштым эскроу счетлашке кучылтде мучашлен кертше проект-влак пурталтыныт. Кумшо дене келшышын, застройщик-шамыч объектым шке оксашт кӱшеш нӧлташ тӱҥалыт.
Тиде реформо дольщик-шамычым ондалалтме деч аралаш шонымаш дене илышыш пурталтеш.
* * *
Эрлашыжымат видеоконференций йӧн денак тиде йодышланак пӧлеклалтше селекторный совещаний лийын. Тудым РФ-н чоҥымаш да илыме вер-коммунал озанлык министр Владимир Якушев эртарен. Тушко Марий Эл вуйлатыше Александр Евстифеев ушнен.
Марий Эл нерген ойлаш гын, регионын правительствыштыже палемденыт: эскроу счетым кучылтын, республик у финансирований модельыш куснаш ямде. Регионысо Чоҥымаш, архитектур да илыме вер ден коммунал озанлык министерствын данныйже почеш, застройщик-шамычын мониторингышт шотышто ямдылалтме пашам эртарыме.
Кызыт республикысе банк ден чоҥышо организаций-влакын у финансирований модельыш куснымо шотышто икте-весышт коклаште паша кая.
Л.КАМАЛЕТДИНОВА.
