Фитнес-аэробике дене Российын чемпионатыштыже Йошкар-Ола гыч «Экстрим» команде икымше верым налын. Тыге тудо элнан чапшым тўнямбал да Европын чемпионатлаштыже аралаш тўҥалеш.
Таҥасымаш Москошто «Измайлово» спорткомплексыште эртен. «Степ-аэробика» номинацийыште ўдыр-влак эн сай результатым ончыктеныт.
Вес кок номинацийыште («Аэробика», «Хип—хоп-аэробика») Москва ден Красноярск гыч команде-влак сеҥеныт.
Тыгай сынан таҥасымаштак элнан первенствыштыже юниор команде-влакат сайын выступатленыт. «Петит-степ» (11-13 ияш) номинацийыште Йошкар-Ола гыч «Аквамарин» кумшо, ты номинацийыштак 14-16 ияш-шамыч коклаште «Грация» команде икымше верыш лектыныт.
Марий Эл спорт министерствын пресс-службыжын палемдымыж почеш, «Экстрим» команде Российын сборный составше дене пырля тўнямбал да Европын чемпионатлаштыже вийжым терга.
Палаш уто огыл: «Экстрим» командыште Евгения Байкова, Ольга Тимофеева, Наталья Пиркина, Екатерина Белоусова, Анастасия Егорова, Яна Камских, Екатерина Москалева, Мария Бычкова, Дарья Токарева Российын чемпионжо лийыныт. Тренерышт: Светлана Лебедева, Марина Федосеева, Елена Бороухина.
Е.Эшкинина.
Снимкыште: «Экстрим» команде.
