Кодшо кечылаште У Торъял районышто депутат да ола ден ял шотан илем администрацийлаште пашам ыштыше-влакын телымсе спартакиадышт эртен.
Моло ийласе семынак теният спортын тӱрлӧ видше дене модмаште таҥасеныт.
Армспортышто пӧръеҥ-шамыч коклаште икымше верыш Масканур ял шотан илем гыч депутат В.Смирнов лектын. Кокымшо верым Тошто Торъял школ директор, депутат И.Ельмекеев сеҥен налын. Чӱксола ял шотан илемыште тений сайлалтше депутат А.Курбатов кумшо вер дене палемдалтын.
Ӱдырамаш-влак коклаште Г.Садовина (Тошто Торъял), М.Подрезова (Масканур) да Е.Домрачева (район администраций) ойыртемалтыныт.
Шахмат дене модмаште икымше верыш М.Калинин (У Торъял поселко) лектын, шашке дене индивидуальный предприниматель, Чӱксола ял шотан илемын депутатше С.Медведев сеҥен.
Пневматический винтовко гыч лӱйкалымаште А.Онучин ойыртемалтын.
Ӱстембал теннис дене модмаште ӱдырамаш-шамыч коклаште З.Павлова (Масканур ял шотан илем), пӧръеҥ-влак коклаште В.Мосунов (У Торъял ола шотан илем) эн тале лийыныт.
Дартс дене модмаште ӱдырамаш-шамыч коклаште Н.Садовина (район администраций), пӧръеҥ-влак коклаште А.Ермаков (Чӱксола ял шотан илем) дротикым эн туран кышкеныт.
Волейбол дене модмаште икымше вер дене район администрацийын командыжым палемденыт.
Тӱрыс налмаште спартакиадыште икымше верым Чӱксола ял шотан илем администрацийын командыже сеҥен налын. Кокымшо верыш Тошто Торъял ял шотан илем администрацийын командыже лектын. Кумшо вер дене Масканур ял шотан илем администрацийын командыже палемдалтын. Саламлена!
Л.КАМАЛЕТДИНОВА
