М.Зуев Медведево районысо Цибикнур селаште куд икшыван ешеш шочын-кушкын: вич эрге, ик ӱдыр. Кызыт Михаил Ивановичым верысе калык тале футболист, куштылго атлет, ечызе, чолга артист, ӱшанле суртоза семын пала. Адакшым тудын ешыже спорт еш семын ойыртемалтеш. А тӱҥалынже чылажат…
Куштылго атлет, ечызе
Мишан кугурак изаже, Виталий, армийыште служитлымыж годым куржталаш шӱмаҥын. Варажым, мӧҥгышкӧ пӧртылмекшат, куштылго атлетике дене пеҥгыде кылым кучен, районышто сеҥышыш лектын. Спортлан шольыжо-влакымат кумылаҥден.
– Мый изирак лийынам, но почешышт шӱдырнылынам. Сайын куржталмем, стартыш лектын, сай результатым ончыктымем шуын, – ойла Михаил Иванович. – Шот лектын вет. Ончыч ече дене кыртмен куржталынам. Эсогыл районышто сеҥышыш, призёр радамыш лектынам. Варажым республик кӱкшытан таҥасымашлаште вием теренам. Тыге лекте: чонемлан куштылго атлетике лишылрак лийын. Ече дене заниматлаш шокшо чием, ботинке, тоя, эше ечыш шӱраш мазь, парафин да моло кырча-марчаже кӱлыт. А куржталаш йолаш ден кедым але кроссовкым чий да – ончыко! Тренировкым шке семынем ыштенам. Варажым тӱрлӧ олалаште лийынам, районын, республикын чапшым араленам, шуко йолташым муынам. «Динамо» клублан куржталынам. Икана Россий кӱкшытыштӧ тудо жапыште тале куштылго атлет-влак Женя Яковлев, Миша Байков дене пырля кумшо верыш лектынна. Теве тыге спортсмен радамыш логалынам.
Пайдале эм гай
М.Зуев варажым Вика ӱдыржӧ ден Алёша эргыжымат таза илыш-йӱлалан кумылаҥден, шкеж ден пырля тренировкыш луктын.
– Ӱпеш чӱчкыдын черлана ыле. Эре санаторий, эмлымвер, тӱрлӧ эмже чоныш витарен пытареныт. Пелашемлан «Уке, тетла тыге огеш лий. Чыла эмым ӧрдыжкӧ кораҥден, куржталаш тӱҥалына», – манынам. Тыге кажне кечын курык коклаште куржталынна. Курыкыш кӱзет, волет… Аваже кугу ош бантым ыштен. Мыйже изиш ончыко куржам, ӱдырем огеш кой. Мӧҥгеш савырнен, курыкыш куржын кӱзем – вуйысо кок бантикше коеш. Тидыже мыланем пуйто маяк, ориентир лийын. Варажым шкежат сайын куржталаш тӱҥалын. Илен-толын, спорт мастер мартеат кушкын. Ешыж дене вес олаште илат, кок икшывым ончен-куштат. Алексей эргымат тале куштылго атлет семын тунемме вузшын, республикын чапшым арален. Кызытат Чулпан шешкым (ече дене спорт мастер) дене тӱрлӧ кӱкшытан таҥасымашлаште вийым тергат. Нунынат кок икшывышт уло.
Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.
Е.Эшкинина.