Нине кумло объектласе корно олмыктымо пашам сентябрь мучашлан шукташ – теве тыгай задачым шынден Марий Эл вуйлатышын пашажым жаплан шуктышо Юрий Зайцев.
Республикын транспорт да корно озанлык министрже Александр Герасименкон ойлымыж почеш, автомобиль кудалыштме корнын 7,4 километр кутышыжым тӧрлаш палемдыме улмаш, но окса ешаралтмылан кӧра 15 объектыште 15 километр корным олмыктат, 2023 ийлан палемдыме объектымат тенийлан кусарыме. Мутлан, Киров урем пурен, молан манаш гын тушто тений у автомагистраль почылтеш. Осипенко, Анциферов, Кремлевская, Лебедев, Гагарин, Бауман уремлаште паша мучашлалтын. Августын пытартыш кечылаштыже Успенский ден Вашский уремлам тӧрлен шуктат.
2023 ийыште 12 объектыште паша ышталтшаш, 9-же конкурсым эртен, подрядный организаций-влакат пале улыт. Киров – Строитель-влак уремлам ушышо кугорным колтымеке, Луначарский уремымат тенияк тӧрлат.
Министр тыгак кӱвар-влакым олмыктымо нерген ойлен: «Тӱҥалтыш ошкылым 2021 ийыште ыштыме, Санчурск тракт дене Шоя эҥер гоч да Водопроводный уремысе Вараксин кӱварлам шотыш кондымо. Тачысе кечылан Тӱҥ кӱвар эн ончыл верыште шога. Тудым олмыкташ 140 миллион теҥгем ойырымо. Пашам 31 октябрьлан тӱрыснек ыштен пытараш палемдыме гынат, корным 1 сентябрьлан почаш ямдылалтына».
Мэр Евгений Масловын мутшо почеш, Юрий Зайцевын кӱштымыжым шуктен, Йошкар-Оласе 15 кудывечым да олан 7 кумдаҥдыме кумдыкшым олмыктат. «Пашам пытарымек, шуко пачеран 40 пӧрт да 5 социальный тӧнеж дек йолын я машина дене кудал пураш корно сай лиеш», – палемден Евгений Маслов.
Марий Эл вуйлатышын пашажым жаплан шуктышо чылажымат жапыште да шот дене мучашлаш темлен, олмыктымо пашалан ешартыш окса ойыралтме нерген йодышым лишыл жапыште рашемдаш сӧрен.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Фото: Д.РЕЧКИНЫН
