Шорык
Тиде арнян окса чӱдылыкым шижыда, сандене шийвундым аныклен кучылтса. Ала-могай арверда але ӱзгарда йомын кертеш, шекланыза. Йӧратыме еҥ дене икте-весе коклаште умылымаш лиеш. Весе-влакын ой-каҥашыштым пешыжак колышташ ида тырше.
Презе
Нине кечылаште чот кӱлешан йодыш-влакым утыждене писын решатлаш ида тырше. Тек чылажат шке йогынжо дене кая. Вий-куатым аныклен кучылташ темлалтеш. У шинчымашым налаш, тӱняумылымашым кумдаҥдаш келшен толшо жап.
Йыгыр
Ешыштыда умылыдымаш лектын кертеш. Тидым кораҥдаш манын, икте-весым колышташ тунемман. Кокыте шонымашым лукшо сомылыш ушныман огыл, уке гын оксадам арам пытареда. Еҥ-влаклан утларак полшаш, поро пашам ышташ тыршыза.
Рак
Тиде арнян вий-куатда ташлыше лиеш. Тиде амал дене тургыжланымым, ала-мо шотышто ойгырымым чарнеда. Окса шотыштат азапланаш огеш логал, молан манаш гын шийвундыда ешаралтеш. Йолташ-шамыч унала толыт але пырля иктаж-кушко каяш тарванеда.
Лев
Кызыт те тунар шуко пашам ыштен шуктеда, эсогыл коллегыда-влак ӧрыт! Шийвундым ешараш ала-могай у йӧным кычал муыда. Тыгодым шке дене кугешныл коштман огыл. Ала-мо шотышто весе-влакын полышышт кӱлеш лийын кертеш.
Ӱдыр
У пашам тӱҥалаш келшыше жап. Йӧратыше-влак ушнен кертыт. Деловой партнер-шамыч паша дене кылдалтше у темлымашым ыштат гын, тидым ида шӱкал, а лучо шотыш налза. Жап дене кӱлеш семын пайдаланен моштеда гын, нелылык деч утледа.
Виса
Ӱдырамаш-Виса-влакым поснак куанле арня вуча, вет нуно пӧръеҥ-шамычын шинчашкышт молгунамсе деч утларак логалаш да келшаш тӱҥалыт. Тыге шкет ӱдыр ден ӱдырамаш-влак тиде арнян шӱмбелыштымат вашлийын кертыт. Такшымат нине кечыла сайын эртат.
Скорпион
Кызыт те пашаште кугурак кӱкшытыш шуын, лишыл еҥ да йолташ-влак дене вашкылым утларак пеҥгыдемден кертыда. Шийвундыдат ешаралтеш, очыни. Пашаче койышда да улшо мастарлыкда дене «курыкымат савырен» кертыда.
Пикшызе
Тыланда кызыт тазалык нерген утларак азапланаш да тудым пеҥгыдемдаш тыршаш темлалтеш. Шкан шукырак жапым ойыраш манын, пашаште отпускым налыда гынат, уто огеш лий. Парымда уло гын, нине кечылаште тудым тӱрыснек пӧртылташ йӧн лектын кертеш.
Ирказа
Тиде арнян шагал огыл тургыжланаш, кокытеланаш тӱҥалыда. Но чыла тиде арам лиеш. Сайынрак шоналтеда гын, умыледа – илышдам те шке чоҥеда, тудлан шке оза улыда. Тугеже ойгырен шинчаш нимогай амал уке. Шӱмбелдалан тӱткышым утларак ойыраш тыршыза.
Вӱд йоктарыше
Тыланда пӧлекым кучыктен, сюрпризым ыштен кертыт, сандене ямде лийза. Ала-кӧ эсогыл йӧратымыж нерген каласен кертеш. Пашаштат чылажат кӱлеш семын воранаш тӱҥалеш. Шкем сай велым ончыкташ йӧн лектеш гын, пайдаланыза.
Кол
Илышыштыда кугу вашталтыш лийын кертеш. Тыланда ешым чумыраш але вес вере илаш куснаш темлат. Но тыгай ошкылым ыштыме деч ончыч сайын шоналтыман. Йӧратыме еҥда эше уке гын, тиде арнян ала-кӧ дене паша шотышто ыштыме вашкыл йӧратымаш шижмаш марте шуктен кертеш.
Ӱпым пӱчкаш тарваненда гын
15 апрель. Таче ӱпым пӱчкыда але чиялтеда гынат, тазалыкда пеҥгыдемеш, илышда кужемеш.
16 апрель. Тиде кечын, мӧҥгешла, ӱп дене нимом ыштыман огыл, уке гын иктаж чер авалтен кертеш.
17 апрель. Ӱпым пӱчкаш келшыше кече огыл – тазалыкда лунчыргымо лӱдыкшӧ уло. Ӱпым хна дене чиялтеда гын, иммунитетда пеҥгыдемеш, пашаште чапда кушкеш.
18 апрель. Ӱпым пӱчмӧ интуицийым вияҥдаш, уш-акылым пӱсемдаш полша. Ӱпым шӧртнялге але кӱреналге тӱсыш чиялтыме шийвундым ешара.
19 апрель. Таче ӱпым пӱчкашат, чиялташат огеш темлалт, уке гын вий-куатда иземеш, окса шотышто нелылыкым шижаш тӱҥал кертыда.
20 апрель. Ӱпым пӱчмӧ пиалым лишемдаш полша, тӱжвал сындам сӧралракым ышта. Ӱпым чиялтыман огыл.
21 апрель. Тиде кечын ӱпым пӱчкыда але чиялтеда гынат, шийвундыда ешаралтеш.
Л.Камалетдинова
Авторын фотожо
