УВЕР ЙОГЫН

Икмыняр чаракым кораҥдыме 

Марий Элыште ресторан, унагудо да библиотеке-влак угыч пашам ышташ тӱҥалыт. 
Республикна пандемий деч вара эркын дене ончычсо илышышкыже пӧртылеш. Таче, 24 июльышто, Марий Элым вуйлатыше Александр Евстифеев коронавируслан кӧра пуртымо икмыняр чаракым луштарен. 
24 июль гыч ресторан, библиотеке, унагудо, пансионат, санаторий, каныме пӧрт ден базе-влак, тыгак моло организаций угыч пашам ышташ тӱҥалыт. Тыгодым, мутлан, общепит организаций-влак палемдыме деч пелылан шагалрак калык дене гына пашам ыштен кертыт. Библиотеке шотан тӱвыра тӧнеж-шамыч помещенийыште 1 еҥлан шотлымаште 4 кв.м кумдыкым ойырышаш да персонал ден калык коклаште 1,5 м деч шагал огыл коклам кучышаш улыт. Тыгак ик ӱстелтӧрыш икте деч шуко еҥым шындышаш огытыл. 
Идалык мучко пашам ыштен кертше унагудо, пансионат, каныме пӧрт ден базе, санаторий-курорт шотан организаций ден тазалыкым пеҥгыдемдыме йоча лагерь-шамыч граждан-влакым Роспотребнадзорын Марий Элысе виктемышкыже ончылгоч увертарен вераҥден кертыт, тыгодым калык проектысе куатын 50 процентше деч шуко лийшаш огыл. 
Тыгак 24 июль гыч аттракционым уремыште эртарыше, каныме да спорт арверым арендыш да прокатыш пуымо услугым шуктышо организаций, уремысе зоопарк-шамыч пашам ышташ тӱҥалын кертыт. 

Марий Элым вуйлатышын организаций да аналитике виткемжын уверже негызеш М.ИВАНОВА ямдылен

Опубликовать в Одноклассники

Добавить комментарий