14-20 февральлан гороскоп
Шорык
Тендам ласка арня вуча манаш неле. Шочмын але кушкыжмын пелаш дене неле йодышым каҥашаш логалеш. Изарнян гын коктын эсогыл вурседылмаш марте шуын кертыда. Тыге ынже лий манын, шкем тыматлын кучыза, шӱмбелдам утларак умылаш тыршыза.
Презе
Ты арнян шӱдыр-влак шонымашке шуашак тыршаш, тидлан утларак чолга лияш темлат. Родо ден лишыл еҥда-влакат полшаш ямде лийыт. Арня кыдалне личный илышыштыда ала-мо уда лийын кая. Очыни, йӧратыме еҥ дене кыл пужла. Но каныш кечыла вашеш кыл тӧрлана.
Йыгыр
Тенданат йӧратыме еҥ дене кыл локтылалтын улмаш гын, кызыт тудым саемден кертыда. Иктаж-кушко каеда гын, тушто шкендан деч кугурак ийготан еҥ дене палыме лийыда. Мӧҥгыштӧ кырча-марча сомыл дене кылдалтше нелылык лектын кертеш.
Рак
Тиде арнян шукертсе шонымашдам шукташ – мӧҥгышкӧ у мебельым але быт техникым налаш – йӧн лектеш. Вӱргечын пелаш але шӱмбел дене пӱсӧ йодышым ида каҥаше, уке гын сырен кертыда. Пошкудо, палыме, родо-шамыч денат ӱчашымаш марте шумо деч шекланыза.
Лев
Те йӧратымаш кылдам аклен ончалыда да шӱмбелдан эше ик ала-могай сай шӧрынжым пален налыда. Але марте мужыраҥын огыдал гын, марлан лекташ темлымашым пӧръеҥ-влак лач кызыт ыштен кертыт. Тидлан шочмо ден каныш кечыла поснак келшыше лийыт.
Ӱдыр
Тиде арнян йырда порядкым ышташ кумылаҥыда. Мӧҥгыштӧ веле огыл, пашаштат. Тазалыкым пеҥгыдемдаш мондыман огыл. Поснак кылмен черланыме деч шекланыман. Йӧратыме еҥ дене шкендам тыматлынрак кучыза, уке гын сырен кертыда.
Виса
Усталык шӱлыш ешаралтмым шижыда. Шкет улыда гын, шӱмбелым муаш манын, тӱрлӧ вере кошташ тыршыза. Икшыван-влаклан йоча-шамычлан молгунамсе деч кугурак тӱткышым ойырыман. Тунам икте-весе кокласе кылда утыр пеҥгыдемеш.
Скорпион
Шӱдыр-влак ешлан кугурак жапым ойыраш кӱлмӧ нерген шижтарат. Поснак кугу тӱткышым лишыл еҥ-влакын тазалыкыштлан ойырыман. Чыла тиде темлымашым шуктеда гын, ешда тунар пеҥгыде лиеш – кужу жаплан нигушко кайымыда шуаш огеш тӱҥал.
Пикшызе
Тендан корнышко тарванаш кумылда лектеш. Мӧҥгыштӧ шинчаш огыл манын, чыла йӧным кучылташ ямде лийыда. Пиалеш, ты арня тидлан келшен толшо лиеш. Корнышто але у верыште иктаж-кӧ дене палыме лийын кертыда. Ончыкыжым тиде кыл тыланда пайдам конда.
Ирказа
Тендам окса дене кылдалтше йодыш ик эн чот тургыжландараш тӱҥалеш. Ешлан але шканда иктаж-могай сатум налаш кумылаҥыда. Тидым арня тӱҥалтыште але каныш кечылаште ыштеда гын, «ӱмырышт» кужу лиеш. Лишыл еҥ-влак кокла гыч ала-кудыж дене сырен кертыда.
Вӱд йоктарыше
Тыланда шкем вияҥдаш, уш-акылым утларак пйодараш темлалтеш. Тӱжвал сыныш вашталтышым пурташ келшыше жап. Арня кыдалне у еҥ дене палыме лийман огыл. Уке гын тиде ончыкыжым тендан нерген тӱрлӧ манеш-манешым колташ амалым ыштен кертеш.
Кол
Тиде арням ласкан, тыматлын эртарымыда шуаш тӱҥалеш. Сандене утларак жап шкет лияш тыршыза. Каныш кечылаште у еҥ-влак дене палыме лийын да нунын дене пырля иктаж-кушко канаш миен толын кертыда. Тыге кумылда чотак нӧлталтеш.
Ӱпым пӱчкаш тарваненда гын
14 февраль. Таче ӱпым пӱчкыда гын, лишыл еҥда-влак дене кыл локтылалт кертеш. Ӱпым чиялтыме кумылдам утыжым огеш волто, тыгодымак куандара манашат неле.
15 февраль. Тиде кечын ӱпым пӱчмылан кӧра илышыштыда иктаж уда лийын, тазалыкда шотышто нелылык лектын кертыт. Ӱп тӱс дене экспериментым эртараш лиеш.
16 февраль. Ӱпым пӱчкашат, чиялташат келшыше кече огыл – тазалыкда лунчырген кертеш, шкем удан шижаш тӱҥалыда.
17 февраль. Ӱпым пӱчкыда гын, оксада шагалемын, иктаж-мо уда лийын кертыт. Чиялтеда гын, пиал шыргыжалеш.
18 февраль. Таче ӱпым пӱчкаш огеш темлалт. Чиялтеда гын, кумылда нӧлталтеш.
19 февраль. Ӱпым пӱчмӧ деч вара еҥ-влак дене вурседылмашке шуаш тӱҥал кертыда. Ӱп тӱсымат вашталташ огеш темлалт.
20 февраль. У прическым ышташат, ӱпым чиялташат келшыше кече – тылеч вара кумылда нӧлталтеш, тазалыкда саемеш.
