Парламентаризм арня кышкарыштак С.Г.Чавайн лӱмеш калыкле книгагудын кугыжаныш символ-влак залыштыже «Российысе парламентаризмлан – 120 ий» книга выставке почылтын.
Тушко мийыше-влак энциклопедий, справочник, шуэн вашлиялтше монографий, революций деч ончычсо да кызытсе журналла гыч статьяла дене палыме лийын, XX курым тӱҥалтышыште ыштыме фотографий-влакын копийыштым ужын кертыт.
Выставкым эн ончыч Кугыжаныш Погын председатель Михаил Васютин ден алмаштышыже, СВО-н ветеранже, «Герои Марий Эл. Талешке-влак» регионысо кадр программын участникше Александр Смирнов онченыт. Уна-влаклан экскурсийым тӱҥ библиограф Наталья Осокина эртарен.
Ончер ик тылзе пашам ышташ тӱҥалеш.
Любовь Камалетдинова
