САМЫРЫК ТУКЫМ

Ӱшан уло гын – чыла сеҥаш лиеш

Тачысе лаштыкын унаже «СЖС Восток Лимитед» компанийын генно-модифицированный организмым шымлыше секторжын вуйлатышыже, чолга марий ӱдыр Оля Унженина. Тудо Киров кундем Пижанский районышто шочын-кушкын. Мари Ошай школым тунем пытарымеке, Юл кундемысе технологий университетыш шинчымашым погаш пурен. Тушто садово-парковый да ландшафт чоҥымо инженерлан тунемын. Ты жапыштак генно-модифицированный организмым (ГМО) шымлаш кумылаҥын. Садлан бакалавр деч вара, ты университетышкак магистратурышто «Биотехнология» специальностьым налын. Тудым йошкар диплом дене тунем пытарен.

— Студент илыш ӱмырешлаш шарнымашеш кодеш маныт, тый ты пагытым кузе эртаренат?

Тунемме жапыште шуко научный статьям возенам. Тӱрлӧ конференцийлашке нуным луктынам. «Микросателлитный локусын анализшылан эҥертен тӱрлӧ пушеҥгын идентификаций йӧнжым радамлымаш» пашам дене «Умник» конкурсышто сеҥышыш лектынам. Грантым пуэныт. Ты шийвундо дене пайдаланен туныктышем дене пырля пушеҥгым идентификцироватлыме йӧным лончылымо. ДНК анализлан эҥертен шолыштмо пушеҥге-влакым верештме. Кок ий  тыршымекем, ончыкылык пашам ГМО дене кылдем манын ӱшаным йомдарен омыл.

— Тунемме деч вара корнет кушко наҥгаен?

Икымше курс гычак  «Россельхозцентр» компанийыште биопрепарат-влакым лукмаште микробиологлан тыршенам. Тиде мылам ты организацийын вуйлатышыже да специалистше-влак дене чак палыме лияш йӧным ыштен. Тыге Ростов-на-Дону олашке ГМО сатум шымлыше лабораторийыш куснаш ӱжмашым налынам. Кӱчык жапыште тушко кусненам. Ик ий пашам ыштымеке, ты верыште карьере тошкалтыш дене кӱшкӧ кӱзаш ок лийым, умыленам.

Ростов кундем шке пасужо, комбайнже да пырчыж дене чаплана. Тыге мый Ростов-на-Дону оласе «СЖС Восток Лимитед» зернон качествыжлан анализым эртарыше эн кугу лабораторийыш пашам ышташ пуренам. Тиде Швецарийысе организацийлан шотлалтеш.

Тыште, эн изи должность гыч тӱҥалын, шкемым сай пашаеҥ семын ончыктенам.  Мылам лабораторийыште ГМО-м шымлыше шке секторым почаш темленыт. Кум тылзе жапыште секторым «чоҥенам» да пашам ышаш йӧршыш шуктенам. Куштылго лийын манын ом керт. Пырля пашам ыштышым эртен кайымемлан  сырышат лийыныт.

Моско олаште лу кечаш курсым эртен да шинчымашем нӧлтен, мый секторышто кугуракын пашажым шукташ тӱҥалынам. Тыгак палымемым, моштымемым молылан туныктенам.

Ончыч мый тидын нерген шонен гына кертынам. Тыге гынат тиде шым ий чын корно дене ошкылынам. Компаний мыйым акла да пагала – тиде тӱҥ. Пашам куаным конда. Лудшо-влакланат шке келшыме пашаверым муаш тыланем.

— Яра жапым кузе эртарет?

Мӧҥгыштат паша дене кылдалтше книгалам лудам, плакат-влакым ыштем. Спорт дене кылым кучем, йӱштылаш келша. Тыгак тортым, когыльым кӱэштам.

Киров кундем да Марий Элын пӱртӱсыштым поснак йӧратем. Ача-ава деке ялыш уналыкеш толмо годым жапым уремыште эртараш тыршем. Уло кече пакчаште тыршаш ямде улам. Чодыраш емыжым, поҥгым погаш миен толашат куан.

Ялысе фото-влакым Ростов-на-Дону олашке пӧртылмеке чӱчкыдын лаштыклем. Пырля пашам ыштыше-влакланат ончыктем. Нуныжо ӧрыт: «Пӱртӱсда пеш мотор. Кузе тыгай вер-шӧрым коден каен кертынат?»

— Тау Оля, ончыкылык корнет волгыдо лийже!

Тау!

О.МОШКИНА

Опубликовать в Одноклассники

Добавить комментарий