САМЫРЫК ТУКЫМ

Модышла веле чучын…

Тачысе лаштыкын унаже – Кужэҥер район Рушплак ял гыч мотор марий ӱдыр Мария Милютина. 8 ий тудо Шорсола школыш коштын гын, 9-ше классым Ростов олаште тунем пытарен. И.С.Палантай лӱмеш тӱвыра да сымыктыш колледжын, Марий кугыжаныш университетын выпускникше. Кызыт «Эрвел марий» ансамбльыште кушта, Калык усталык да культурканыш паша шотышто республикысе шанче-методике рӱдерыште пашам ышта, тыгак «Изи памаш» ансамбльын хореографше улеш.

— Маша, кушеч кушташ кумылет лектын?

       2011 ийыште Тӱвыра да сымыктыш колледжыш тунемаш пуренам. Тунам хореограф профессий нерген сайын пален омыл. Ростовышто илыме годым изам колледжыш кушташ пурен манын колалтын. Мыйымат ӱжын: «Айда, пурен ончо». Тудын почеш тунемаш пурен сеҥем манын, школ деч вара Йошкар-Олашке толынам. Изам ала-могай куштымашым мыланем шындыш. «Тидым ыште, тудым ыште», — манын ойлыш. Мыланем чылажат модыш гай веле чучын. Экзамен кечыламат пешыже ом шарне. Пурем гын пурем, уке гын мӧҥгеш Ростовыш каем манын шоненам.

— Тугеже тый ончылгоч  хореограф лиям   манын шонен отыл. Туге гынат ойырен налме специальность дене шинчымашым умбакыже МарГУ-што нӧлтенат.

 Колледжыш пурымеке, ик пагыт нимом палыде, пеш йӧсӧ ыле. Молан тыште улам манын шоненам. Кумшо тунемме ий мучаште, йоча-влак дене пашам ышташ тӱҥалме годым, умбакыже кӧ лийшашым иже умылаш тӱҥалынам.

Тунемме годым «Воштончыш» театрын марий группышкыжо хореографлан пашам ышташ пуренам. Тудын режиссёржым Марий Элын калык артистшым  Светлана Никитинам икымше наставникемлан шотлем да кугу таум каласынем. 
      Пытартыш курсышто шонкален-шонкален, умбакыже мом ыштымашым вискалаш логале. Университетыште хореографий группым погаш тӱҥалыт манмым колмеке, тиде мыйын корнемак манын шонен миенам.
        — Маша, сценыште куштыметым ужмеке, пуйто тый тидланак шочынат шонет…

Сценыш университетыште тунемме годым веле шукыракше лекташ тӱҥалынам. Славик Асмаевын «Цармис», Нина Макарован «Ныжыл сем» ден «Салика», Наталья Смирнован «Сударушка» ансамбльышкышт коштынам. Эн шукыжо – «Эрвел марийыш».  Тушко тудын вуйлатышыже Тамара Дмитриева ӱжын.

7-8 ий ончыч кеҥежым Йывансола ялыште «Ял ӱмбалне мужыр йӱксӧ» кином сниматленыт. Ме пырля тунемме ӱдыр-влак дене тушто икмыняр сӱретыште куштенна.

— Студент пагыт утыжым шеҥгелне кодын огыл. Тый волонтёр семын пашам шуктен шогенат?

Университетын да республикын мероприятийыштышт волонтёр семын шуко тыршенам. Иктаж-кӧм вашлияш але фотограф семын полшенам. 2018 ийыште «Ӱдырсий» конкурсыштат участвоватленам. Мом ыштен кертам манын, шкемым шуко вере тергаш тӧченам.

       — Мария, тыйын шонымаште, илышыште мо эн тӱҥ?

       —  Тиде еш, родо-тукым. Тыгак шкем тӱрлӧ йыжыҥыште вияҥдымаш икымше верыште лийшаш.

А кызытсе жап тидым шукташ шуко йӧным пуа.

О.МОШКИНА

Опубликовать в Одноклассники

Добавить комментарий