Кажне ийын Марий тиште кечым палемдыме амал дене В.М.Васильев лӱмеш йылмым, сылнымуытым да историйым научно-шымлыше Марий институт шанче-практик семинарым эртара. Тений тудо марий калыкын тӱҥалтыш жапысе историйже дене кылдалтше ӱчышымашан йодыш-влакым каҥашымашлан пӧлекталтын ыле.
Тушко шанчызе, журналист, тӱвыра пашаеҥ-влак погыненыт. Нуным саламлаш Марий Эл Правительстве Председательын икымше алмаштышыже М.Васютин, Кугыжаныш Погын Председательын алмаштышыжын полышкалышыже А.Петров толыныт.
Кушеч марий калык лектын? Теве тыгай тӱҥ йодыш йыр каҥашымаш каен. «Марий калыкын тӱҥалтыш историйжым шымлымаште шуко пален налме гынат, эше ӱчашымашым лукшо йодышыжо ятырак кодеш», — палемдыш семинарым почшыжла шанче институтын директоржо Евгений Кузмин. Ты але вес йодыш шотышто шанчызе-влакат ик семынак огыт шоно. Вара мутым Марий кугыжаныш университетын профессоржо, историй науко доктор Валерий Патрушев налын. Тарватыме теме дене докладым ыштен. А теве лӱмлӧ археолог, историй науко доктор Татьяна Никитина марий калыкын шочмо историйже нерген пургедме паша годым мумо кокла курымласе археологий памятник-влаклан энертен каласкален. Культурологий доктор Галина Шкалина шке докладыштыже марий фольклорын сылнылык тӱняжым этносын тӱняумылымашыжын воштончышыжо семын ончыктен.
Тарватыме йодыш-влакым погынышо-шамыч чолган каҥашеныт, шке шонымашыштымат луктын ойленыт.
С.Носова.
М.Скобелевын фотожо.
