УВЕР ЙОГЫН

Ӱп йога? Ӱй полша!

Пайдале каҥаш

Таче ме тендам касторовый ӱйым кушто да кузе кучылташ лийме дене палдарынена.

— Ӱйым ик копашке изишак чӱчыктыза да весыж дене ваш йыгыза. Ынде ӱпда мучко эртыза. Кажне арнян кеч ик гана тыге ыштеда гын, тылзе наре гычак ӱпда пеҥгыдырак лиймым шижыда.

— Касторовый ӱй да кефир гыч ӱплан маскым ышташ лиеш. Тидлан стаканыш кефирым темыза да шокшо вӱдан атыш ырыкташ шындыза. Ӱй левымеке, тушко 5 чӱчалтышым пыштыза, сайын лугыза да ӱпышкыда, вуй коваштышкыда йыгыза.

Пайда утларак лийже манын, вуйыш полиэтилен упшым упшалза, ӱмбакыже солыкым пӱтыралза. Пел шагат гыч ӱпдам мушса.

— Ӱпда йога? Адакат касторовый ӱй полшен кертеш. Тидлан 1 ужаш ӱйыш 2 ужаш ош аракам ешарыза да ӱп вожыш йыгыза.

— Лыге шерым темен гын, пеҥгыде заваркан чайыш 1 изи совла касторовый ӱйым, 20 г ош аракам ешарыза да ӱп вожышкыда йыгыза. Ик шагат гыч мушкын колтыза.

— Шинчапуным кушташат тиде ӱяк полшен кертеш. Малаш вочмыда деч ончыч тудым йыгыза да эр марте кучыза. Икмыняр гана тыге ыштымеке, шинчапунда кӱжгӱрак лийшаш.

Л.КАМАЛЕТДИНОВА

Опубликовать в Одноклассники

Добавить комментарий