Кодшо кок номерыште ме Елена Нестеренкон рецептше-влак дене палдарышна гын, таче ынде пелашыжыным савыктена. Содыки палаш оҥайыс: Италийыште мом кочкаш шолтат? Сийым кузе ямдылат? Мемнан деч чот ойыртемалтеш мо? Чыла тидын дене таче тендам чын итальянец палдараш тӱҥалеш!
«Лазанья»
– Таче ме «Лазаньям» ямдылена. Тудо итальян калыкын ик эн тамле да перкан кочкышыжлан шотлалтеш, – каласкалаш тӱҥале Сандро. – Тиде такше – шылан кочкыш, но тудлан эшеат ныжылге тамым «Бешамель» сливочный соус пурта.
«Лазанья» кум тӱҥ ужаш гыч шога. Икымшыже – руаш. Кокымшыжо – «Бэшамель», кумшыжо – пакчасаска ден шыл гыч рагу.
Ынде кажныжым посна ышташ тӱҥалына.
Эн ончычак руашым ямдылена.
Тидлан кӱлыт:
* 2 муно,
* 200 г ложаш,
* ик чывыштыш шинчал.
Тыге ямдылыман:
- чылажымат пырля пыштена, руашым нӧштылына да пел шагат наре жаплан «каналташ» пыштена. Тылеч вара тудым 12 изирак чумыркалан шелына да кажныжым чо-от вичкыжын шарена. Ынде тушеч 15х20 см кугытан ужаш-влакым пӱчкеден луктына;
- тиде жапыштак лапкарак каструльыш, тазыш але кугу кӱмыжыш 2-3 литр вӱдым шолаш шындена. Тушко пел кочмо совла наре шинчалым ешарена. Шолаш пурымекше, пӱчкедыме ужаш-влакым тушко 30 наре секундлан пыштена. Вара, лопка совла дене коштал налын, вигак йӱштӧ вӱдыш пыштен луктына. Тыге тудо пеҥгыдемеш да огеш кушкедле. Тылеч вара уто вӱдым пунчал луктына да ӱстембаке пыштыме солыкыш кошташ шарен оптена.
Ынде «Бешамель» соусым ямдылена. Тидлан кӱлыт:
- 1 л шӧр,
- 100 г ушкал ӱй,
- 100 г ложаш,
- ик чывыштыш шинчал,
- пел изи совла наре йоҥыштымо але нӱжымӧ мускат пӱкш.
Тыге ямдылыман:
- эн ончычак ӱйым шулыктарена, тушко 150 мл шӧрым ешарена, вара ложашым изин-изин пыштена да эркын лугена. Тыге падыраш-влак огыт лий. Тылеч вара кодшо шӧрым тыгак эркын йоктарен ешарена да, эре луген шоген, кугурак тул ӱмбалне нугыдо ӱмбал лиймешкыже 10-15 минут кучена. Тышкак шинчалым да пӱкшым пыштена.
Рагулан кӱлеш:
- 1 сельдерей вурго,
- 1 шоган,
- 1 кешыр.
Тыге ямдылыман:
- чыла тидым тыгыдемдена да кушкыл ӱйыштӧ тушитлена. Вара тушко пел кило фаршым (пелыже – сӧсна шыл, пелыже – ушкал шыл) изин-изин ешарена. Тышкак пел литр наре томат соусым пыштена да ик шагатат пеле наре изи тулышто немыр гайрак лиймешкыже, вӱд пучымешке, шолтена.
Ынде «Лазаньям» «погаш» тӱҥалына.
Тидлан противень але поднос пундашыш эн ончычак рагум изиш пыштена да шарена. Вара ик лончо семын шолтымо руаш пӱчкыш-шамычым оптена. Умбакыже радам дене 3 кугу совла рагум, тынарак соусым да нӱжымӧ сырым посна лончо семынак пыштена. Ынде адакат шолтымо руаш ужаш-влакым оптена да чыла тидымак шарена. Тыге 4-5 гана лийшаш. Но мыняр радамым пыштыме противень але поднос кӱкшыт дене кылдалтеш. Тич оптен шындаш гын, духовкышто кӱктымӧ годым тӱргоч каен кертеш. Сандене подносын кок кумшо ужашыже лиймешке веле оптыман.
Эн пытартышлан сыр ӱмбаке 10 изирак ужаш ушкал ӱйым оптена да 180 градусым чӱктымӧ да ырыктыме духовкышто 30-35 минут наре, ӱмбалныже сырын ком гай лиймешкыже да чевергымешкыже, кӱктена.
«Лазанья» ямде! Перкан лийже!
А секрет семын Сандрон пелашыже, Елена Александровна, теве мом палемдыш: руашыш 2 муным пышташ гын, кок противень кочкыш лектеш. Сандене кӧлан шагалрак але шукырак кӱлеш – тидым шотыш налман.
Тыгак рагум лучо ончылгоч, кастенак, ямдылаш. Тыге эрлашыжым «Лазаньям» писынрак ышташ лиеш.
Тиде ешыште уна лиймем годым «Лазаньям» чылан пырля ыштышна. Кумытын кухньышто «шолна» гына: икте руашым нӧштылеш, кокымшо шара да вичкыжемда (нунын гын тидлан посна машинкышт уло), кумшо пӱчкеда. Вара адакат иктыже пӱчкыш-шамычым вӱдыш шолташ пуртен луктеш, весе шарен опта, кумшо соусым шолта…
Шогылташ шагал огыл логалеш гынат, жапдам ида чамане, вет «Лазанья» чынже денак моткочак тамле! Мый гын ну куанен кочна ве-ет!..
Любовь Камалетдинова
Авторын фотожо
