Граждан обществым вияҥдымаште коммерческий огыл организаций-влаклан (НКО) пуымо Президент грант-влакын кӱлешлыкышт моткоч кугу.
Тений мартыште Президент грант-влак фонд грантым пуышаш шотышто икымше конкурсын иктешлымашыжым увертарен. Тудын дене келшышын, Марий Эл гыч 4 НКО-м ойырен налыныт. Сеҥыше-влак коклаште «Товарищество инвалидов творческого труда» организацийым палемдыман.
Тудым Любовь Александровна Веденькина вуйлата. Тиде НКО «Тӱвыра да сымыктыш дене кылдалтше проект-влаклан полшымаш» грант направлений дене «Мы вместе» проектым ямдылен. Тудо инвалид-сӱретче ден йоча пӧрт ден школ-интернатла гыч икшыве-влакын усталыкышт да тукым-влакын икте-весышт дене кылым ыштымышт гоч иктеш ушымо социальный реабилитацийыштлан виктаралтын.
Ончыкыжым вес кундемлаште улшо тыгай сынан организаций-влак денат кылым ышташ да пашам виктараш палемдат.
Проект 2020 ийыште илышыш пурталташ тӱҥалын да умбакыжат шуйна. Тудым илышыш шыҥдарымаште организацийын еҥже, проектын командыже тыршат. Ончыкыжым Марий кугыжаныш университетын педагогике да психологий факультетше гыч волонтер-влакымат ушаш шонат. Проектын пашашкыже инвалид-влакын организацийышт, йоча пӧрт ден школ-интернат-влак, тыгак Юл кундемысе кугыжаныш технологический университетын пашаеҥже-влак да кушто выставке ден мастер-класс-влак эрташ тӱҥалыт, нине организацият ушнышаш улыт манын палемдалтеш.
Проект тыгай шонымаш дене илышыш пурталтеш:
— иквереш чумырген, мастер-классым, модмо урокым, театрализоватлыме касым, тӱрлӧ теме дене сӱрет конкурсым эртараш да еҥ-влакым духовно-нравственно кушташ;
— конструироватлыме да моделироватлыме пашалан, сӱретче Любовь Веденькинан творческий мастерскойыштыжо ургаш туныкташ;
— куэм гыч курчакым ургымо шотышто творческий, ремесленный мастер-класс-влакым эртараш;
— приют ден йоча пӧртлаште илыше-влакым инвалид-сӱретче-влак кагаз дене пашам ышташ туныктат да ончыкыжым эн сай паша-влакым йомак курчак театрыште экспозицийыште кучылтыт да молат.
Проектым возышо да илышыш пуртышо-влак ӱшанат: нунын пашашт калыклан моткочак кӱлешан. Тудо еҥ-влаклан культурно вияҥашышт полша.
Л.КАМАЛЕТДИНОВА
