«Калевала» жапысе финн ӱдырамаш-влакын ассоциацийышт Хельсинки олашке финн-угор ӱдырамаш мер организацийын чолга еҥже-шамычым семинарыш чумырен.
Ассоциацийын председательже Ильдико Лехтинен да вуйлатышыже Сирппа Хуттунэн организацийыштын пашашт нерген каласкаленыт. Тудо 1935 ийыште почылтын да финн тӱвыра йӱлам арален кодаш да вияҥдаш ышталтын. Тушто 4000 еҥ шотлалтеш. Ассоциаций «Пирт» журналым савыкта, тыгак тудын пелен «Калевала Кору» ювелир фирме пашам ышта.
Хельсинкиш Коми Республик гыч Российысе финн-угор тӱвыра рӱдерын филиалжым вуйлатыше Т.Барахова, Удмуртий гыч филологий науко доктор, профессор Н.Кондратьева, Хант-Мансий автономный округ гыч «Ханты ясанг» газетын журналистше Л.Спирякова, Марий Эл гыч «Саскавий» ӱдырамаш ушем вуйлатыше Л.Кошкина ден вуйверын еҥже А.Эманова миеныт.
Кажныже организацийын пашаж дене палдарен. Людмила Спирякова Югра кундемыште ӱдырамаш толкынын вияҥмыжым палемден. Тудын мутшо почеш, хант ден манси ӱдырамаш-влак пытартыш жапыште чотак тыршат. Шукын оласе ден ял шотан илемын депутатше лийыныт. Ты калык гыч лекше науко доктор ден кандидат-влак кокла гыч 85 процентше — ӱдырамаш. Нуно илыш дене тӧр ошкылыт, ожнысо йӱламат арален кодымаште чотак тыршат.
«Саскавий» ушемын еҥже-влак самырык да йоча-влаклан этнофорум ден этноконкурсым эртарыме, марий мультурокым ямдылыме нерген ойленыт.
Семинарын участникше-влак М.Кастрен ушемын офисышкыже миеныт, «Калевала» тӱнямбал кечын (28 февраль) Элиас Лӧннротын памятникше воктек пеледышым пыштеныт, Хельсинки оласе сӱрет тоштерыште финн калык вургемын дефилештыже лийыныт. Музейыште уна-влаклан куэ кумыж гыч шергашым, моло сӧрастарыме ӱзгарым ыштыме мастер-классым ончыктеныт. «Калевала Кору» фирмылан — 80 ий» семинарыште тӱрлӧ археологий экспедицийыште мумо арверым ужаш лийын. Туштак уна-влак ончылно Йоуко Хейколан вуйлатыме калык ансамбльже усталыкым ончыктен.
Кум кече жапыште семинарын участникше-влак финн-угор ӱдырамаш ушем-влакын ончыкыжым пырля пашам ыштымыжым каҥашеныт.
Л.ШАБДАРОВА.
Снимкыште: Финн-угор ӱдырамаш ушем-влакын семинарышкышт шке калыкын эн чолга ӱдырамашыже-шамыч чумыргеныт.
