МЕР КАҤАШ

Ятыр вашталтыш вуча

26 мартыште Йошкар-Олаште Марий Эл Республикын кудымшо созыв Кугыжаныш Погынжын 47-ше сессийже эртыш.

Тушто депутат-влак 10 йодышым ончышт. Эн ончычак нуно ик мандатан избирательный округ-влакын у схемыштым пеҥгыдемдышт. Тудын дене лишыл лу ий жапыште пайдаланаш тӱҥалыт. Тиде теве могай амал дене ышталтын. Кугыжаныш Погынын кудымшо, кызытсе, созывше 50/50 йӧн дене сайлалатын: 52 депутат гыч 26 еҥже ик мандатан округла гыч, моло тынарак еҥже — партийный списке дене. А шукерте огыл закон вашталтын да ынде 75/25 схеме почеш сайлалтыт: 39 еҥ ик мандатан округла гыч, 13 – партий-влак деч. Округ-влакын ешаралтмыштлан кӧра нунын чекыштым уэш палемдаш кӱлын.  Тыге сентябрьыште эртышаш сайлымаште ик мандатан округлаште сайлышаш-влакын чотышт икнаррак — 13 тӱжемат 900 еҥ наре — лийшаш. Ойыртем 10 процент деч шуко лийшаш огыл. Куд округышто – 20 процентым эртышаш огыл.

Сессийыште 2019 да плановый 2020 ден 2021 ий жаплан республиканский бюджетыш вашталтышым пуртышт. Тений доход ден роскотын тӱрыс кугытышт 30 млрд. теҥгем эрта, профицит – 458,5 млн. теҥге. Тидыже налог деч пурышо окса ешаралтме, федеральный бюджет гыч шийвундо ойыралтме дене лийшаш. Тыге у бюджет дене муниципал образований-влаклан окса полыш шукырак ойыралташ тӱҥалеш, мутлан, районлаште пӱртӱс газым пурташ, самырык еш ден тулык икшыве-влаклан илыме верым ситараш, тӱвыра да каныме объект-влакым ышташ да тӧрлаташ. Тидын дене пырля корно фондлан роскот ужашым ешарыме.

Тыгак Марий Элын Молодёжный парламентше нерген положенийыш вашталтышым пуртышт. Тӱҥалтыште тудо кок ият пеле жаплан сайлалтын, вара – кум ийлан, а пытартыш жапыште – вич ийлан. Но парламентын членже-влакын армийыш служитлаш, вес кундемыш пашам ышташ, тунемаш, илаш кайымыштым, молым шотыш налын, кызыт  парламентым уэш кок ият пеле жапланак сайлаш мутланен келшышт.

Сессийыште депутат-влак Йошкар-Ола судебный районысо 12-шо №-ан да Курыкмарий судебный районысо 21-ше №-ан суд участке-влакын мировой судьяштым лу ий жаплан шогалтымым пеҥгыдемдышт.

Парламентарий-влак Марий Элын шымше созыв (2019-2024) Кугыжаныш Погынжын депутатшын удостоверенийжын да оҥеш пижыктыме знакшын образецыштым пунчал дене пеҥгыдемдышт.

47-ше сессийыште Марий Эл Республикын 4 законжым да Кугыжаныш Погынын 13 пунчалжым приниматлышт.

Любовь Камалетдинова.

Опубликовать в Одноклассники

Добавить комментарий