Александр Михайлов Татарстанысе Агрыз район Кадрек ял шотан илемым вуйлата.
— Селаш ныл ий ончыч илаш кусненна. Тысе илышлан ынде тунем шуынна. Мӧҥгеш олаш пӧртылмӧ нерген огынат шоно, — ойла пӧръеҥ.
Армий деч вара Александр шочмо Кадрекыштыже шоферлан пашам ыштен. Варажым тора кундемлаш теҥыз дене коштын. Икмыняр ий Ижевскыште чоҥымаште тыршен. Монтажник, мастер лийын. Перестройко годым Удмурт кугыжаныш университетыште менеджерлан, кӱшыл экономике школын курсыштыжо тунемын.
Икмыняр ий страховатлыме бизнесыште бухгалтерлан пашам ыштымеке, шочмо селашкыже пӧртылын. Александра пелашыжат ялыш илаш каяш кумылаҥын. Ӱмаште Александр Михайловым ял шотан илемын вуйлатышыжлан сайленыт, сандене тудо вуйге села илышыш пурен.
— Мылам тыште чыла келша. Пӧртна ял мучаште, воктенак — пӱя. Телым вакым ыштем, южгунам йӱштылашат пурем. Йырваш — нимучашдыме пасу, теве чодыра коеш. Пелашем дене ече дене кошташ йӧратена, — каласкала Александр Алексеевич.
Михайловмытын шкеныштынат озанлыкышт уло. Нуно ынде икмыняр ий кроликым ашнат.
— Интернетыште ты вольыкым ашныме нерген сюжетым ончымеке, нуным налаш кумылем лекте. Кызыт 40 наре кроликна уло. Нуно 5-6 тылзе жапыште кушкын шуыт. Кочкыш шотыштат огыт кычалтыл. Телым олымым, пырчым, шудым пукшем. Шым ава кролик теле мучко игым кок гана ышта. Нунылан посна четлыкым ямдыленам. Уло ешна кролик шылым моткоч йӧрата. Ижевскыште илыше икшывына-влак шылым ужалашат наҥгаят. Тыге парышымат изиш налына. Уныка-шамыч гын эре тиде пунан вольык воктене почаҥыт. Нунылан тыште – шкешотан зоопарк, — манеш А.Михайлов.
Михайловмыт мӱкшымат ончат. Тыгодым омартам телылан уремыште кодат, молан манаш гын кӧргӧ гыч пенопласт дене шокшемденыт.
— Омарта деке пылышым лишемдымеке, мӱкшын ызгымыжым колат. Эр шошым, кечын ырыкташ тӱҥалмекыже, нуно чоҥештен лектыт. Тугеже мӱкшна тамле шошо мӱйым ик эн ончыч пога, — ӱшандарен ойла оза.
Кодшо кеҥежым нуно кӱркамат ашненыт, ончыкыжым казам, презым налнешт. Кургым ямдылаш мландышт, техникышт уло. А телым Александр Алексеевич изаж дене пырля ял уремымат лум дечын эрыкта. Михайлов вуйлатыше гына огыл, тыгак тракторист, шофер, сварщик, коҥга оптышо.Тудын кидыште чыла пашажат ворана.
Д.АБЗАЛИЕВА.
Л.ШАБДАРОВА.
Снимкыште: А.Михайлов кроликым кумылын ашна.
