Илышыштына иктаж-молан да кӧлан да сырена. Икте удам ойла, весе осал койышыж дене сырыкта, кумшо шоненак ӱчым ышта. Ме шыдешкена гынат, эреж годым тидын нерген луктын огына каласе. Осал шарнымашым ала-молан кӧргыштына «ашнена». Тыге тӱрлӧ чер лектеш. Тидын деч кораҥаш манын, еҥым проститлаш тунемман. А кузе тидым ышташ? Психолог Татьяна Павленко икмыняр ой-каҥашым пуэн. Айста нуным шергал лектына.
- Молан сырымыда нерген шоналтыза. Айдеме вурседылме годым мом ойлымо нерген огеш шоно, шуко кӱлеш-оккӱлым луктын ойлен кертеш. Лыпланаш жап кӱлеш. Икмыняр кече гыч ты ситуацийым ушыштыда шергал лекса. Тудо тыланда ынде осалын ок чуч гын, сырашыжат нимолан.
- Чон корштымыдам ида шылте. Шортнеда – шортын налза. Вийым сай могырыш виктарен колтыза: сӱретлен ончыза, спорт дене кылым кучыза.
- Тушманда нерген утларак пален налаш тыршыза. Молан тудо тендан шыдыдам луктын? Ала айдеме тидым лӱмын ыштен огыл. Можыч тудын койышыжо тыгай. Ме вет чылан тӱрлӧ улына. Икте мыланна келша, весе уке. Тидым тӧрлаш ок лий. Ваш шинчын мутлананен ончыза.
- Сырымыда нерген каласыза. Ала вес еҥ тендан шонен коштмыда нерген огешат пале. Мутланаш ӧрмалгеда гын, серышым возыза. Тудым огыда колто гынат лиеш. Тӱҥжӧ – чондам почса. А кагазым йӱлалташ лиеш.
- Шкендам ӧрдыж гыч ончалза. Тендан койышыштат ала иктаж йоҥылыш уло. Вет кеч-могай туманлымаште эре кок еҥ титакан манын, арам огыт ойло.
Сырымаш, ӧпкелымаш чоныштына утыждене погына гын, тиде шкенан да йыр улшо-влакнан илышыштым локтыл кертеш. Жап эртымеке, уло тӱнялан шыдешкыше еҥ лияш огыл манын, вашла проститлыза. Пиалан да таза лийза!
О.МОШКИНА
