Преступленийым ужшо еҥ тидын нерген нигуш шижтарен огыл гын, тудым мут кучаш шогалтат мо?
Д.Конюхов.
Медведево посёлко.
Йодышлан Медведево районысо прокурорын кугурак полышкалышыже Л.Р.Давлетшина вашештен:
— Преступленийым ужшо еҥ тидын нерген уверым шылтышаш огыл, уке гын, РФ Уголовный кодексын 205.6 статьяж дене келшышын, мут кучаш логалеш. Тушто ончыкталтын: Уголовный кодексын 205, 205.1, 205.2, 205.3, 205.4, 205.5, 206, 208, 211, 220, 221, 277, 278, 279, 360 да 361 статьялаштыже ончыкталтше кеч ик преступленийжым ыштыше але ышташ ямдылалтше лица (лица-влак) шотышто сведений раш пале гын, преступлений нерген уверым ончышо кучем органыш увертарыдымылан 100 тӱжем теҥге марте але пашадар кугыт, але судитлыме еҥын куд тылзе марте налме парышыж наре тӱлаш пуат, але идалык марте виеш пашам ыштыктат, але тиде пагытланак эрык деч посна кодат.
Уголовно мут кучаш преступленийым ыштыше але ышташ ямдылалтше еҥын пелашыжым да лишыл родо-тукымжым гына огыт шогалте.
С.Носова ямдылен.
