Палынем ыле, тений республикыштына мыняр еҥ пенсийыш лектын? Пенсионерын удостоверенийже могай правам пуа?
Н.НИКОЛЕВА
Звенигово район
Йодышлан Россий Федераций Социальный фондын Марий Элысе пӧлкажын пресс-службыштыжо тыге вашештеныт:
– Тений идалык тӱҥалтыш гыч пенсионерын таныкшым регионышто илыше 3476 еҥлан пуымо.
Пенсионерын таныкше – тиде пенсийым налше еҥын статусшым пеҥгыдемдыше документ. Тудо, мутлан, тӱшка транспортышто, аптекыште, кевытыште, театрыште, музейыште да моло вере льгото да скидке дене пайдаланаш правам пуа.
2021 ий гыч документын форматше вашталтын. Ынде удостоверений олмеш пластик картычкым пуат, туштыжо пенсионерын фотожо, лӱмжӧ, фамилийже да ачалӱмжӧ, СНИЛС-ше, пенсийын видше ден жапше ончыкталтыт. Айдеме кок тӱрлӧ пенсийым налеш гын, таныкыштыже тидымат палемдат.
Республикыште илыше пенсионер-влаклан тошто образецан пенсий удостоверенийым у дене вашталташ огеш кӱл. Тыгодымак пенсионерын таныкшым сулен налме канышыш лекше чыла еҥ налын кертеш. Тудым оформитлышашлан Россий Федераций Социальный фондын Марий Элысе пӧлкажын кыл-рӱдерышкыже 8-800-200-11-70 номеран телефон дене йыҥгыртен возалташ лиеш. Таныкым офисыш мийыме кечынак пуат. Пелен паспортым да 3х4 кугытан чиян але шем-ош тӱсан фотографийым налман. Фотографий уке гын, тудым клиент службыштак ышташ лиеш.
М.ИВАНОВА ямдылен
Россий Федераций Социальный фондын Марий Элысе пӧлкажын фотожо
