Тыгак кок кече жапыште Юл кундем федеральный округын самырык спортсменже-влак «Юл кундемын спорт олимпше» йоча пӧрт-влакын воспитанникыштлан эртыше окружной спартакиадыште таҥасеныт.
Республикын сборный командыштыже 12 ӱдыр-рвезе лийыныт. Шахмат дене модмашке Тулык да ача-аван полышышт деч посна кодшо йоча-влаклан Лӱльпанысе рӱдер гыч кок рвезе ушнен. Тушечынак да тынарынак куштылго атлетике эстафетыште вийыштым тергеныт. Тиде рӱдер гычак Максим Шамрай ӱстембал теннис дене таҥасымаште мастарлыкшым ончыктен. А мини-футбол дене Тулык да ача-аван полышыж деч посна кодшо йоча-влаклан Волжскысо рӱдер гыч 8 воспитанник модыныт. Пытартышышт кыдалаш ийготан-влак тӱшкаште 5-ше верыш лектыныт.
Но тӱрыс команде дене Марий Эл гыч ӱдыр-рвезе-шамыч призан верыш логалын огытыл. Икымше вер дене Мордовий гыч йоча-влак палемдалтыныт. Кокымшо вер – Киров область гыч командын, кумшо – Саратов областьын.
Кажне конкурсышто сеҥышыш лекше-влаклан шарнымашан пӧлекым кучыктеныт.
Л.Камалетдинова.