Кызыт Йошкар-Олаште дошкольный организаций-влак коклаште Каналташ лекме участке-шамычын оласе смотр-конкурсышт эрта. Тушто 40-ше №-ан «Шöршудо» йочасадат участвоватла.
Тиде йочасадыште куд группо уло, тушко 155 ÿдыр-рвезе коштеш. Кажне группо кечывал деч ончыч шке площадкышкыже лектеш. Йоча-влак сай игечыште ошмаште модыт, луҥгалтышыште лÿҥгалтат, курык гыч мунчалтат, пушеҥге гыч велше лышташым погат, лумкурчакым ыштат гын, йÿраныште але луманыште верандыште юарлат.
Рÿдоласе йочасад-влак коклаште «Шöршудым» ик эн моторлан шотлаш лиеш. Тыште зданий веле огыл, уремысе кумдыкат кумылым савырат. Пытартышыж шотышто йочасадын пашаеҥже ден ача-ава-влак чот тыршат. Икымшыже тугакшат мотор клумбым эшеат тÿзатеныт: эр шошо гыч лум вочмеш черет дене пеледше кушкылым ешарен шынденыт, кувшин да тыгыде шаргÿ гыч сöрал дизайным келыштареныт, воспитанник-шамычлан мон кузе атыланымыжым да чумыргымыжым ончыкташ пакчасаска нöшмым ÿденыт, чыла тидым шыркаҥдаш «мÿкшым» колтеныт гын, кокымшыжо йоча площадке-шамычлан йöршын у шÿлышым пуртеныт: бизиборд-влакым сакалтеныт, сÿретым сÿретленыт, тÿрлö фигур ден модышым вераҥденыт… Чылажым радамленат от пытаре!
Педсоветыште кажне площадкым посна теме дене сöрастараш кутырен келшеныт. Мутлан, кыдалаш группын площадкыжым «Вÿд йымалнысе тÿня» манын лÿмденыт да тудым океанлаште, теҥызлаште, эҥерлаште, ерлаште илыше моллюск да кол, вÿдпорсын, азап годым пайдаланыме утарыше оҥго, вÿд суднын якорьжо да моло арвер полшымо дене сылнештареныт, беседке ÿмбаке эсогыл вапшым кудалтеныт. Изирак группыш коштшо йоча-влак «Йöнан пöртыштö» модыт. Тыште нуно абажурым чÿктат, холодильник гыч продуктым луктын, газ плита ÿмбалне кочкаш ямдылат, кухньыш шындыме гарнитур дене пайдаланат, эсогыл окнашке ончалыт… «Цирк», «АБВГДейка», «Копшаҥге-влак», «Весела математике» площадке-влакат оҥай улыт, вет кажныштыже модмо веле огыл, эше усталыкым шуарыме, ала-мом уым пален налме, экспериментым эртарыме да шымлыме кумдык-шамыч улыт. Нунын полшымышт дене нöргö ÿдыр-рвезе-влак кумда илыш корныш лÿддымын лекташ ямдылалтыт.
– Мом ыштыме гын, утларакше – йоча-шамычын ача-авашт кÿшеш. Нуно мемнан эн ÿшанле эҥертышна, эн кугу полышкалышына улыт. Кеч-кунам кеч-мом йод, кеч-мом темле – чыла вере кумылын да чолган ушнат, чыла пашам писын, чаткан да кÿлын шуктат. Сандене кажныжлан кугун тауштем, – куанен манеш йочасадым вуйлатыше Наталья Лаптева (снимкыште). – Конкурсышто сеҥыше-влак радамыш логалына гын, конешне, пеш сай ыле… Но мыланна тиде тынарак огыл, мыняре ача-ава-шамыч дене ик ойыш шуын моштымына, келшен илымына шергакан. Чыла тидым йоча-влак ужыт да шижыт, ончыкыжым ача-авашт гаяк сай айдеме лийыт манын ÿшанем.
М.ИВАНОВА
Авторын фотожо
