Марий Эл угыч Российын рӱдолашкыже юж капкажым почеш. Тидлан йӧнжӧ Марий Эл вуйлатыше Александр Евстифеевын кугу тӱткышым ончыктымыжлан кӧра лектын. Тудо ик гана веле огыл ты йодышым тарватен да республикыште илыше-влаклан аэропортым почаш задачым шынден. Россий парламентын кӱшыл палатыжын спикерже Валентина Матвиенкоат 2018 ий декабрьыште Федераций Советыште Республикнан кечыжым палемдыме годым ты ойым кӱлешанлан шотлен.
Шонен пыштымым кӱчык жапыште илышыш пуртен кертме. Марий Эл вуйлатыше мартыште аэропортысо самолёт шичме-нӧлталтме корным олмыкташ правительствын резерв фондшо гыч 12 миллион теҥгем ойырен, да тушто пужен ыштыме пашам тӱҥалме. Тудым вес тылзе тӱҥалтыште мучашлаш шонат.
Кужун вучымо икымше рейсым, Москва гыч толшо самолётым, Йошкар-Оласе аэропорт 8 июльышто вашлиеш. А 9 июльышто, эрдене, Йошкар-Ола гыч пассажирым наҥгайыше самолёт элнан рӱдолашкыже чоҥешта.
Тидлан кузе ямдылалтме нерген аэропортыш погынышо журналист-влак ончылно Марий Эл правительстве председательын икымше алмаштышыже обязанностьым жаплан шуктышо Александр Сальников каласкален.
Кеҥеж отпуск жапыште ты увер шукыштым куандара. Москва гыч самолёт 21 шагатат 50 минутлан тарвана гын, Йошкар-Ола гыч – 6 шагатат 15 минутлан. Таклан огыл тыгай расписанийым ойырен налме: командировкыш, путешествоватлаш але унала эр тарваныме кеч-кунамат йӧнан. А Москва гыч варарак лекме дене тушто чыла пашам ыштен шукташ лиеш.
Кызытеш самолёт-влак Йошкар-Ола гыч Москваш да мӧҥгешла чоҥештылаш тӱҥалыт, а вара кечывалвел кундемлашкат, каныме верлашке, рейс почылтеш. Но чылажат шкенам, йодмаш могайрак лиймым, онча. Ты шонымашым илышыш пуртышашлан тӱҥалтыште республикнан правительствыжат регион бюджет гыч дотацийым ойыра.
Йошкар-Оласе аэропорт директор Андрей Бородулян палемдымыж почеш, Марий Элыште илыше-влак авиакылым уэш ылыжтымым чытен-чытыдымын вучат, а тидлан жап ынде шукак кодын огыл.
Ю.Исаков.
Снимкыште: А.Сальников ден А.Бородуля – аэропорт ончылно.
М.Скобелевын фотожо.
