Шернур районысо озанлык-влак тений икымше кварталыште шӧрым кодшо ийысе тыгаяк жап дене таҥастарымаште 394 тоннлан шукырак лӱштеныт.
Тиде кечылаште тысе озанлык-шамыч кажне ушкал деч сутка еда кокла шот дене 19,9 килограмм шӧрым шупшылыт. Ончылий тиде жапыште 3,2 килограммлан шагалрак лийын. Ондаксе семынак ончыл радамыште «Семёновский» племзаводын кумшо отделенийже ден «Восход» колхоз улыт. Икымше озанлыкше тений кум тылзыште шӧрым ӱмашсе деч 415 тоннлан шукырак шупшылын гын, кокымшыжо – 17 тоннлан. Тыгодымак «Сердежский» ЗАО 14 тоннлан шагалрак шӧрым лӱштен, «Земледелец» артель – 10, «Северный» артель — 7, «Лажъял» артель — 2 тоннлан шагалрак.
Районышто 3881 вуй тӱкан шолдыра вольык шотлалтеш, 84-лан ешаралтын. «Восход» колхоз ден «Семёновский» племзаводын кумшо отделенийже ушкал кӱтӱштым ятырлан кугемденыт, а молышт иземденыт. Кызыт озанлыклаште ушкалым шукияш шудылыкыш лукташ ямдылалтыт.
Грантым налше ешаралтеш
Тений апрель мучаште республикысе тӱҥалше кандаш фермерлан кресаньык озанлыкым почаш да вияҥдаш, тыгак фермер озанлык негызеш кок еш фермым почаш грантым кучыктымо ыле. Тӱҥалше фермер-влак кокла гыч кугыжаныш полышым налше кок еҥже Кужэҥер район гыч улыт.
Салтакъял ял шотан илем кундемыште илыше А.Хасиев ден Руш Шой вел гыч К.Алексеева фермер озанлыкыштым шукерте веле огыл почыныт. Коктынат ончыкыжым тӱкан шолдыра вольыкым ашнаш тӱҥалыт, шӧрым ыштен налаш ямдылалтыт. Бизнес-планыштышт ончыктымо почеш, нуно ойырымо полыш окса дене сай урлык вольыкым ашныше ончыл озанлыкла гыч тӱж тунам, тыгак у техникым налаш палемденыт. Тений гыч грантын кугытшым кум миллион теҥге марте кугемдыме. Тыгай полыш дене тӱҥалше фермер-влаклан сай ошкылым ышташ келшыше йӧн ышталтеш.
Шке кундемым шке тӱзатат
Марий Турек район Косолоп ял шотан илем кундемысе вич ялыш тений пӱртӱс газым пуртен шуктат. Кызыт Косолап села гыч Сысоево велыш кӱкшӧ давлениян газ пучым шупшаш тӱҥалме.
Ял калыкын илышыжым саемдыме шотышто шагал огыл моло пашат шукталтеш. Мутлан, федерал программылан эҥертен, Озаҥсола ден Изи Мунамарий ялла марте пеҥгыде шартышан корным нӧлтымӧ. А ял калыкын вийже дене нине ялла мучко тыгаяк корным ыштыме. Верысе калыкын тӱҥалтышыжлан полышым пуымо республик кӱкшытан программе почеш, Арып ял мучко сай корным ыштен шуктымо. Но кызытеш Косолоп селасе уремлаште корно чот локтылалтше. Ынде тудым ачалаш кӱлеш. Тылеч посна яллаште шӱкшакым погымо йодышат кызытеш тургыжландарыше. Вет кундемыште лицензиян свалке уке. Тений шуктышаш эше ик кугу задаче – федерал мландым (ончычсо ОПХ-н) муниципал собственностьыш кусарен шукташ. Тудо ончыкыжым бюджетыш ешартыш оксам шукырак кондаш тӱҥалшаш.
В.Смоленцев.
