Марий Элыште коронавирусан черле-влакым эмлаш эше 30 верым ойырымо, да тиде чот ынде 750 койко марте шуын.
Тазалыкым аралыме министр М.Панькован мутшо почеш, ешартыш койкым тыгак Марий Турек районысо рӱдӧ больницыште шындаш лиеш. Тылеч посна Волжский районысо Кичиер посёлкышто верланыше COVID-19 инфекцийым чытен лекше-шамычлан реабилитацийым эрташышт йӧным ыштат.
Республикысе инфекционный стационарлаште черле-влакын чотышт огеш изем. 18 июньышто тушто 652 еҥ эмлалтын. Тиде чот гыч 16 пациент шодым искусственно вентилироватлыме йӧн дене шӱлен, 250 черлылан кислород кӱлын, 170 еҥ неле состоянийыште лийын. Тыгодымак 50 еҥым стационар гыч мӧҥгӧ колтымо гын, 61 черлым эмлалташ пыштыме.
Медицине пашаеҥ-влаклан шкем аралыме средствым ситарыме. 17 июнь марте нунылан 139 млн. утла теҥге кугыт выплатым ыштыме.
Роспотребнадзорын Марий Элысе виктемжым вуйлатыше С.Булатован каласкалымыж гыч, пытартыш суткалаште COVID-19 дене инфицироватлалтме коэфициент 1,9 процент лийын. 18 июньышто коронавирус дене черланыме 47 у случайым регистрироватлыме, да тиде чот ынде 2557 еҥ марте шуын. Утларакше пашам ыштыше калык инфицироватлалтын, сандене пандемий пагытыште лӱдыкшыдымылык санитарный мере-влакым шукташ моткоч кӱлешан. Тыгодымак пытартыш кум ий дене таҥастарымаште кызыт пневмоний дене палынак шукын черланат, нунымат инфекционный койкылашке эмлалташ пыштыман.
Республикысе кок лабораторийыште чылаже 55241 шымлымашым эртарыме.
Ведомствым вуйлатыше РФ Конституцийыш тӧрлатымашым пуртымо шотышто йӱклымашлан ямдылалтме паша денат палдарен.
А.Евстифеев пневмонийым тӱҥалтыш йыжыҥыште рашемдашлан диагностикым тӱткын эртараш каласен.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
