ЛӰМГЕЧЕ

Эше книга ден газетым лудеш!

16 декабрьыште Йошкар-Олаште илыше Клавдия Казанаевалан 100 ий темын.

Тудым курымаш лӱмгечыж дене Марий Элын социальный вияҥмаш министржын алмаштышыже Андрей Компаниец ден Йошкар-Олаште калыкым социально обслуживатлыме комплексный рӱдерын пашаеҥже-влак саламленыт да Россий президент Владимир Путинын саламлымашыжым, шарнымашан пӧлекым, сылне пеледыш аршашым кучыктеныт.

Клавдия Нестеровна Угарман область Шараҥ район Лебедево ялыште шочын. Ныл классым тунем пытарымыж деч вара колхозыш пашам ышташ каен. Ӱдыр иктаҥашыже-влак коклаште пашам йӧратымыже, тыматле койыш-шоктышыжо, поро шӱм-чонжо дене ойыртемалтын, сандене верысе шуко качылан келшен, поснак – Йыванлан. Но мужыраҥаш Кугу Отечественный сар чаракым ыштен. Йӧратыме еҥжым сӧйыш ужатымеке, Клавдия моло дене пырля фронтлан полшен.

 Фашист Германийым сеҥымек, Иван Андреевич ден Клавдия Нестеровна сӱаным ыштеныт. 1959 ийыште вате-марий Казанаевмыт Йошкар-Олашке илаш кусненыт. Ик эргым да кок ӱдырым ончен куштеныт. 1976 ийыште Иван Андреевичын ӱмыржӧ кӱрылтын.

100 ияш гынат, Клавдия Нестеровна эше пеш чолга, шуко мом шарна да оҥайын каласкала, телевизорым онча, книга ден газетым лудеш. «Пылышем гына начарынрак колеш», – воштылеш юбиляр.

Клавдия Казанаеван тукымжо моткоч кугу. Таче тудо вич уныкажым, уныкаже-влакын вич шочшыштым, уныкажын ик уныкажым да уныкажын уныкажын уныкажым ончен куанен ила.   

М.ИВАНОВА

Опубликовать в Одноклассники

Добавить комментарий