Звенигово йоча библиотекыште Православный книган кечыжлан пӧлеклалтше оҥай мероприятий эртен.
Тудым вӱдышӧ библиотекарь З.Бутенина ден рушарня школын преподавательже Л.Романюк ямдыленыт. Пайремыш Звенигово оласе 1-ше №-ан школын да лицейын тунемшыже-влак толыныт. Мероприятийым святитель Николай Мирликийский черкын настоятельже Антоний ача почын.
Пайремым вӱдышӧ Зейтуна Магазовна духовный сынан икымше изданий-влак дене палдарен, поснак 455 ий ончыч лекше «Апостол», тыгак «Часовник», «Азбука» книга-шамыч нерген радамлын каласкален. А Людмила Николаевнан чот святой Шочынаван илышыж нерген каласкалымыж деч вара йоча-шамыч тудлан возымо мурым муреныт.
Икшыве-влак «Царица Небесная», «Ава шӱм», «Шочынава», «Аралыше» гай духовный шӱлышан ятыр почеламутым лудыныт, Юмо нерген мутланеныт. Пайрем поро шӱлыш дене эртен да йоча-шамычлан шуко уым пален налаш йӧным ыштен.
М.ИВАНОВА
