КУЧЕМЫШТЕ

Эшеат ынеж чакне

 

31 августышто Марий Эл вуйлатыше Александр Евстифеев Студенка поселко воктенысе кумдыкышто торф йӱлымӧ верлаште тудым йӧртымӧ паша кузе кайымым ончен савырнен. Вет тушеч алят шикш лектеш.

Регион вуйлатышым палдареныт: ты вер тул дене огеш йӱлӧ. Тудым электропередаче линий тураште йӧртеныт. Но кызыт тушто 2 га наре кумдык торфяник эҥеш. Тидым чараш рукавная линия манме дене пайдаланат. Тудыжым Студенка поселкышто улшо пӱя гыч торфяник деке шупшыныт. Рукавын кужытшо – 1,5 км. Тушто кызыт ончыкшым утарыше лияш ямдылалтше студент-влакат тыршат. Торф эҥмым йӧртымӧ дене пырля эше чодырам эскерыме пашамат шуктат. Кодшо йӱлышӧ вер-влакым пытарымаште чылаже 250 еҥ да 50 единице технике пашам ыштат.

– Ме пожарым кучен кертынна да тулым Казанский трактыш колтен огынал. Тиде моткочак сай. Тул ылыжме вер-влак угыч йӱлаш ынышт тӱҥал манын, умбакыжат пашам ыштыман, –   каласен Александр Евстифеев.

Ситуацийын чынже дене могай улмым аклышашлан йӱлымӧ верым тудо кӱшыч ончаш кӱлеш манын палемден.

– Тиде я тудо решенийым приниматлаш тидыже ешартыш аргумент лиеш. Чрезвычайный ситуаций режимым умбакыжат кодашна логалеш. Мемнан задачына – тул дене кылдалтше йодышым йӧршеш петыраш, – пытартышлан ойлен Александр Евстифеев.

* * *

1 сентябрьыште Волжск олашке миен толмыж деч вара Марий Эл вуйлатыше Александр Евстифеев чодыра пожар нерген мутланаш оперштабыш пурен лектын да оперативный совещанийым эртарен.

Тушто палемденыт: кызыт чылаже 6 гектар кумдык эҥеш. Тӱҥ вийым да средствам окарауливанийлан кум участкыште: Шап ер, Студенка эҥер да Сосновый Бор кумдыклаште – эҥше верлажым эскераш да пытараш виктарыме.

Республикысе правительстве председательын алмаштышыже Степан Воронцов палдарен: тылеч ончыч регион вуйлатыше могай верым ончен савырнен, тушто чодыра кӧргыш 20 метрлан ончыкырак каен кертме.

– Теҥгечысе кечылан Мартын ден Чуркан ерла кумдыкышто обстановко  уда могырыш вашталтын огыл. Тидым арален коден кертына гын, ме изирак группировкынам вес вере колтена, – ойлен Степан Воронцов.

Палемденыт: РФ Обороно министерстве деч ик Ми-8 вертолет чодыра пожарым йӧрташ ямде шога. 20 август гыч вертолет-влак чылаже 527 гана 1719 тонн вӱдым ястареныт.

Кызыт Россий МЧС-ын Марий Элысе тӱҥ управленийжын дознавательже-влак Медведево районысо Куяр лесничестве кумдыкыш пурышо Сосновый Бор илем воктене ылыжше пожарын тӱҥалме амалжым рашемдат. Кызытеш палемдыме почеш, тудо кукшо манме волгенчылан кӧра тӱҥалын.

* * *

1 сентябрьыштак Александр Евстифеев пожар деч варасе сӱретым кӱшыч ончен аклен.

Россий Федерацийын Федеральный Собранийжын Федераций Советшын председательжын алмаштышыже Константин Косачев да Марий Элын правительстве председательжын алмаштышыже Степан Воронцов дене пырля тудо пожар лийме верлам ончен. Тушто кызыт пожарный-влак ден технике пашам ыштат.  

Игече йӱкшемден да коклан йӱр йӱреш гынат, чодыраште мардеж пуалме дене южо вере эше тул уэш ылыжеш. Кава гыч тыгай сӱретым ужмекше, Марий Эл вуйлатыше вигак координатым пуэн да пожарный-шамыч тыманмеш тиде верыш кудалыныт.  

Чоҥештен савырныме деч вара Александр Евстифеев пожар жапыште полышым пуымыштлан экипажлан тауштен.

– Чрезвычайный ситуаций режимым ме шочмо марте кодена. А шочмын, сӱрет могай улмым аклен, умбакыже мом ыштышаш шотышто решенийым приниматлена, – каласен Александр Евстифеев журналист-влаклан.

 

Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен.

Опубликовать в Одноклассники

Добавить комментарий