Владимир Путин президентын Юл кундемысе федеральный округышто полномочный представительже Михаил Бабич дене вашлийын.
Россий президент химический разоружений шотышто кугыжаныш комиссий председатель М.Бабич дене паша вашлиймашым эртарен. Тушто химический оружийым пытарыме шотышто Российын тӱнямбал обязательствыжым шуктымо йодышым каҥашеныт.
Михаил Бабичын палемдымыж почеш, тӱнямбалне 70,5 тӱжем наре тонн химический оружий погынен. Тышеч эн кугу шапашыже Россий Федерацийыште – 40 тӱжем тонн, 27 тӱжем тонн – американец-шамычын. Кодшыжо – южо моло элын.
Конвенцийым 192 кугыжаныш подписатлен. Кызыт Россий тиде программым илышыш шыҥдарыме пытартыш этапыш лектын. Химический оружийым пытарыше шым объект гыч кудытыштыжо паша тӱрыс мучашлалтын. Удмурт Республикыште «Кизнер» объектыште гына тиде паша кая.
Паша 2018 ий 31 декабрь марте мучашлалтшаш. Но чарак ок лий гын, Михаил Викторовичын палемдымыж почеш, тудым ятырлан ончыч пытарен кертыт.
Л.Камалетдинова.
