Экономике – таче
Ак кушмо деч аралаш
Марий Эл тений социально кӱлешан кочкыш сатулан рознице ак дене Юл кундем федерал округышто ӱшанле верым налеш. 25 позиций гыч 17-ыштыже сату ак округысо кокла кугыт деч палынак ӱлыкшӧ. Тидыже калыкын продуктым налын кертме йӧнжым пеҥгыдемден ончыкта.
Тыгодымак федерал торгайыше сеть-влак социально кӱлешан икмыняр сатулан акым 5-10 процент деч утыжым огыт нӧлтал. Тыге тудым келшыше кӱкшытыштӧ кучаш йӧным ыштат.
Кучемын задачыже рынкысе ситуацийым эскераш веле огыл, тыгак потребитель ден предприниматель-влакын кумылыштым шотыш налаш да ак кушмо деч аралаш, палемден Марий Эл прокуратурысо мер советыште каҥашыме годым республикын промышленность, экономике вияҥмаш да сатулымаш министрже Владимир Халюзин.
Юрий ИСАКОВ
Минпромторгын сайтше гыч налме фото
