Марий Эл Республикын Пӱртӱс поянлык, экологий да йырым-йырысе средам аралыме министерствыже Юл кундем технологический университет дене пырля республикын Йошкар Книгашкыже пуртымо кушкыл-влакым шукемдыме пашам эртара.
Пытартыш жапыште тыгай кушкылжо шагалем толеш, сандене экологий дене кылдалтше ты йодыш пӱсын шога, палемдат специалист-влак. Тиде амал денак университетын Ботанический садыштыже тыгай кушкыл-влакым шке гыч ончен куштат да нуным верлаш луктын шындат. Рокыш шындыме материал сайын атылана. Тений тыгай кушкылым Медведево районсо Старожильск воктенысе кумдыкыш вераҥдыме. Кузе атыланымыжымат эскереныт да кушто озымым ылыжтараш кӱлын гын, тыгай пашамат эртареныт. Тений тыгак Кужэҥер районысо «Горное заделье» заказникыште ончыч шындыме кава нулта, Морко районысо Карман курыкышто вӱршудо кушкыл-влакын кузе тырлымышт шотыштат мониторингым эртареныт.
Каласен кодыман: Йошкар книгаш пуртымо кушкыл-влакым искусственно ончен куштымо паша республикыште 2010 ий гыч вораҥеш. Чылаже Йошкар книгашке пуртымо 14 тӱрло кушкылын 1000 наре экземпляржым ончен куштымо да пӱртус условийыш вераҥдыме.
Сӱгыгол эҥырыш логалшаш
Куйбышевысе водохранилищыш пурышо Юл эҥерын Волжск оласе кумдыкышкыжо 10 тӱжем наре сӱгыол игым колтымо.
Кажныже 10 грамм деч кугырак. Ты пашам «Главрыбвод» ФГБУ-н Камско- Уральский филиалжын республикысе Колым кучымо да вӱд биологий поянлыкым аралыме пӧлкан специалистше-влак шуктат. Ты кумдыкыштат икмыняр ий гыч сӱгогол шукемеш манын ӱшан уло.
С.НОСОВА
С.НОСОВА
