ЭКОЛОГИЙ

Вончо — ик эн яндар

Морко районышто Вончо лӱман изи эҥер уло. Тудо чодыра кокла гоч йоген эрта да Элнетыш ушна. Марий кугыжаныш университетын студентше-влак ятыр ий почела эҥерыште вӱдым терген шогат да кажне гана палемдат: тушто нимогай бактерий да лавыра уке. Очыни, санденак тушто пеш шуэн вашлиялтше европысо хариус кол ила. Тиде лососевый урлык колым Марий Элын, Ярославль областьын, эсогыл Германийын Йошкар книгашкышт пуртымо, палемдат специалист-влак.

Вончо эҥерын лӱмжат тудын могай улмыж нерген шижтара. Кеч-могай кужытыштыжат тудым йолын вончаш лиеш. Тӱрысшӧ 33 километрыш шуйна. Вончыдӱр ял воктене тӱҥалеш да кугу ужашыже «Марий чодра» национальный парк гоч эрта. Санденак лавыргаш негызшат уке.

С.Носова.

Опубликовать в Одноклассники

Добавить комментарий