Марий Элыште шӱм-вӱргорно чер дене орланыше пациент-влаклан эмлыше препаратым яра ойыраш тӱҥалыныт. 25 мартлан налмаште 51 пациент 162 рецепт дене 78 тӱжем утла теҥгеаш эмым налын.
«Здравоохранений» национальный проектын «Шӱм-вӱргорно чер дене кучедалмаш» региональный проектше кышкарыште Марий Эллан палемдыме чер дене орланыше пациент-влаклан эмлыме препаратым налаш 58 млн. теҥгем ойырымо.
Тидын дене келшышын, миокардын инфарктше ден инсультым чытен лекше, аортокорональный шунтированийым, коронарный вӱргорныш стентированиян ангиопластикым да шӱм-вӱргорно чер шотышто катетер абляцийым ыштыктыше черле-шамыч 23 тӱрлӧ патентоватлыме огыл виян да шергакан препаратым кондымо.
Тиде программе кышкарыште пациент-влак эмым поликлиникын учётышкыжо шогалме деч вара ик ий налыт. Тидыже тӱҥ шотышто Региональный вӱргорно рӱдерыште але первичный вӱргорно отделенийлаште эмлалтше да федеральный льготниклан шотлалдыме черле-шамыч улыт. Эмым нунылан тӱҥ кардиологын палемдыме схемыж почеш ситарат.
Программе эше кум ий пашам ышта, да тиде жапыште республик идалык еда 58 млн. теҥге дене налаш тӱҥалеш.
М.ИВАНОВА
