КУЧЕМ УВЕР

Элын лӱдыкшыдымылыкшӧ – эн тӱҥ  

Кодшо арнян Марий Элыш РФ Федераций Совет гыч сенатор-влак толыныт ыле. Кугарнян, 26 апрельыште, Йошкар-Олаште, Антикризисный рӱдерыште, Федераций Советын Тӱнямбал паша комитет ден Обороно да лӱдыкшыдымылык комитет заседанийым иквереш эртарышт.

Мероприятийым Марий Эл вуйлатыше Александр Евстифеев почо. Тудо тыгай кугу уна-влакын да квалифицированный делегацийын толмышт республиклан моткоч кугу чап да ответственность манын палемдыш. Тыгак республик вуйлатыше заседанийын участникше-влаклан кодшо ий декабрьыште Федераций Советыште 25 ий жапыште икымше гана Марий Элын кечыже-влакым эртарыме нерген ушештарен кодыш, регионын могай кӱкшытыш шумыж денат палдарыш. Тыгодым республикын социально-экономический вияҥмаштыже Российысе парламентарий-влакын кугу рольыштым палемдыш.

— Тендан пунчалым лукмыда да Росавиацийын пашажым шинча ончылныда кучымыда дене 1 июль гыч республикыштына аэропорт пашам ышташ тӱҥалеш манын ӱшан уло, — каласыш А.Евстифеев.

Умбакыже тудо регион ончылно шогышо эн кугу задаче  нергенат ойлыш. Тиде – парымым иземдымаш. Оборонный предприятий-влакын тыршымышт дене коммерческий банк-влаклан тудым 2 миллиард теҥгелан иземден кертмым палемдыш. Тыгак Юл кундем федеральный округышто Марий Элын ялозанлык да искусство шотышто ончылно улмыж нергенат каласыш.

Совещанийын тӱҥ темышкыже куснымеке, регионысо ончыл  предприятий-влакым ушештарен кодыш да гражданский назначениян продукцийым утларак лукташ тӱҥалаш кӱлмым палемдыш.  

Федераций Советын Обороно да лӱдыкшыдымылык комитетшын председательже Виктор Бондарев Российлан 85 регионжынат моткочак кӱлешан улмыштым, нунын тыршымышт дене элнан эшеат виянрак лиймыжым палемдыш. Тунамак Марий машиностроительный заводышто С-300 комплексым ыштымылан тауштыш да тиде предприятийын ончыкыжым эшеат вияҥаш кугу йӧнжӧ уло манын шонымыж нерген каласыш. 

— Марий Элын рӱдолаштыже мый икымше гана улам. Моткочак мотор, сай ола, сай еҥ-влак улыт. Мый тыланда умбакыжат вияҥаш тыланем. Тек тендан чылажат эн кугу кӱкшытыштӧ лиеш, — палемдыш В.Бондарев журналист-влаклан.

Федераций Советын Тӱнямбал паша шотышто комитетшын председательже Константин Косачев гын тыге каласыш:

— Мый коллегем-влакым Марий Элыш конден да республикнам ончыктен кертмемлан моткочак куаненам да шкемым кызыт эн пиалан айдеме семын шижам. Марий Элым мый моткоч йӧратем да тудо Российыште да тӱнямбалне чапланыше лийшаш. Тудо тидым сула.

Тышке ме кум профильный комитет дене пашам ышташ толынна. Молан манаш гын республикыште мемнан обороноспособностьна «тапталтеш» да уло Российын тӱнялан палыме ядерный щитше уло. Мо тыште ышталтеш – Российысе кажне гражданинлан моткочак кӱлешан. Москвашке пӧртылмеке, тиде команде огеш шалане да Марий Эллан полшаш тыршен, умбакыжат пашам ышташ тӱҥалына манын ӱшанем, — палемдыш Константин Косачев.

Заседаний мучаште Марий Эл вуйлатыше Александр Евстифеевлан да республикын Кугыжаныш Погын вуйлатышыже Юрий Минаковлан Федераций Советын медальжым кучыктышт.

 

«Йыргешке ӱстел»

Заседаний деч вара Антикризисный рӱдерыштак «йыргешке ӱстел» эртыш. Тушто Федераций Советын, республикын правительствыжын еҥышт, Марий Элысе оборонно-промышленный предприятий ден вуз вуйлатыше-влак научный симпозиумын кышкарыштыже элын национальный безопасностьшо нерген мутланышт.

Александр Евстифеев симпозиумын «Современные локационные системы: теоретические основы и приложения» темыже республиклан да пӱтынь эллан моткочак кӱлешан манын палемдыш.

Виктор Бондарев, «Вымпел» компанийын генеральный директоржо Сергей Боев ик шонымашымак каласышт: Россий Федерацийыште национальный лӱдыкшыдымылык шотышто задачым шуктымаште Марий Элын рольжо кугу. Республик научный достиженийже да промышленностьшо дене чаплана. Сандене национальный лӱдыкшыдымылык йодыш арам огыл лачшымак Марий мландыште каҥашалтеш манын ойлышт.  

Тӱҥ йодыш-влак ты отрасльлан кадр-влакым ямдылыме дене кылдалтыныт ыле. Константин Косачев Россий парламентарий-влакым республикын правительствыж дене пырля марий предприятий ден вуз-влаклан системный полышым пуаш йодо.

Пытартышлан «Вымпел» межгосударственный акционер корпораций,  Марий машиностроительный завод, Российысе Науко академийын радиоэлектронике институтшо да Марий кугыжаныш университет вуз пелен научно-образовательный рӱдерым ыштыме нерген ойпидышым подписатлышт.

 

Корнышт заводыш да … чодыра лоҥгашке шуйнен

«Йыргешке ӱстел» деч вара Изи Какшан эҥер сер мучко ончен савырнымеке, Федераций Советын еҥже-влак Марий Эл вуйлатыше дене пырля Марий  машиностроительный заводышто лийыныт.

Предприятийын генеральный директоржо Борис Ефремов заводын историйже, мом ыштен лукмо нерген радамлын каласкален.

Делегаций кӱртньым обрабатыватлыше, автомонтажный цехлаште лийын. Кажныштыже уна-влаклан продукций-шамычын образецыштым ончыктеныт, ончыкылык паша нерген мутланеныт. Пытартышлан предприятийын кумдыкшо мучко коштын савырненыт.

 

Кечывал деч вара делегаций, Стратегический назначениян ракетный войска-влакын ученийышт дене келшышын, Йошкар-Оласе ракетный соединенийын ик ракетный полкшын полевой позицийыштыже лийын.

Тудым ончен савырнымеке, Виктор Бондарев тыге палемден:

— Ме ужына: элна сайын аралалтеш. Тыште профессионал-влак служитлат, вооруженийыште – жаплан келшыше технике.

А республикыштына лиймыже могай шонымашым кодымо нерген ойлымыж годым тудо кадасен:

— Марий Элыште тыгай йӧн-влак улмо мыйым ӧрыктарен.

Москва гыч толшо уна-влакын программышт поян лийын. Нуно тыгак экскурсий дене ола мучко эртеныт, архитектур ден скульптур композиций-влакым ончен савырненыт да вес гана шарналтен ончалашышт фотографийым ыштеныт.

Любовь Камалетдинова.

Опубликовать в Одноклассники

Добавить комментарий