ПАТЫРЛЫК

«Элын аралышыже да ӱшанже улына!»

Тыге ойленыт «Юнармий» всероссийский военно-патриотический толкынын Марий Элысе пӧлкажын слетышкышт чумыргышо ӱдыр-рвезе-влак. Тудо Йошкар-Олаште  Самырык-влакын полатыштышт кумшо гана эртен.

Тиде кечын полат куткышуэла  шолын. Самырык юнармеец-влак тушто шуко оҥайым ужын кертыныт. Фойеште икмыняр площадке пашам ыштен. Марий Элысе МВД-н, МЧС-ын пашаеҥже-влак  тӱрлӧ технике дене палдареныт. Ӱдыр-рвезе-шамыч манекенлан икымше полышым пуэныт. ДОССАФ-ын ямдылыме площадкыштыже  парапланым лишкырак ужаш йӧн лийын.  Марий кугыжаныш университетын «Воскресение» военно-кычалше отрядын еҥже-шамыч раскопкылаште мумо экспонат-влакын экспозицийыштым чумыреныт, тыгодым шкешт Кугу Отечественный сар жапысе салтак-влакын вургемыштым чиеныт.

Теве ик рвезын куан дене волгалтше чурийвылышыже шыргыжалаш таратыш. Тудо кидышкыже автоматым кучен, садлан чонжо вӱчкен докан. Элым аралыше кушкеш, шоналтышым. Мероприятийлан патриот шӱлышым 34096 военный частьын салтак ансамбльже пуртен. Нунын мурымыштым шукын шулен колыштыныт, эсогыл пырля муралтышат койын. Мурымышт чоныштем элым, шочмо кундемем йӧратыме кумылым утларак ылыжтен.

Залыште калык шыҥ погынен. Экраныште Российысе военно-исторический обществын ямдылыме патриот шӱлышан фильмже ончыкталтын. Российын, Марий Элын гимнже-влак йоҥгалтыч. Знаменоносец-влак элнан, республикнан да «Юнармий» толкынын тистылажым нумалын пуртышт. Сценыш «Юнармий» радамыш пураш ямдылалтше ӱдыр-рвезе-шамыч кӱзен шогальыч.

Чылаже организацийын регионысо пӧлкаштыже 67 отряд шотлалтеш. Тушко 3000 утла еҥ коштеш. А 21 сентябрьыште тиде радамыш эше 50 ӱдыр-рвезе ушнен. Нуно толкынын кӱштымыжым шукташ, элым йӧраташ, пагалаш, аралаш товатлен ойленыт.

Юнармеец-влакым Марий Эл правительстве председательын икымше алмаштышыже М.Васютин, молодёжный политике, спорт да туризм министр Л.Батюкова саламленыт. Михаил Зиновьевич йоча-влакым патриот шӱлышеш куштышо наставник-шамычлан республикым вуйлатышын Тауштымашыжым кучыктен.  Тыгак тудо Александр Евстифеевын Марий Эл Кугыжаныш Погыныш «Марий Элын сулло наставникше» лӱмым пуымо нерген инициативе дене лекмыж нерген каласен.

Марий Элын молодёжный политике, спорт да туризм министрже Лидия Батюкова министерствыжын тауштымашыжым  «Паллада» парус клубын юнгаже-шамычлан тений Севастопольышто  Сеҥымашын 73-шо идалыкшылан пӧлеклалтше парадыште участвоватлымыжлан  кучыктен.

 «Юнармий» толкынын регионысо пӧлкажым вуйлатыше А.Мухачёв эртыше идалыкым иктешлен. Тудо Марий Элысе «Юнармий» толкынлан Российын  Геройжо, подполковник Марк Евтюхинын лӱмжым тений 22 майыште пуымо нерген куанен каласен. Александр Мухачёвын мутшо почеш, «Юнармий» ӱдыр-рвезе-влаклан шкем илышыште муаш полша. Арам огыл тений Марий Элын 89 юнармеецше Российын икмыняр кӱшыл военный вузышкыжо тунемаш пурен.

Тыгак нелылык шотыштат мутым луктын. Мутлан, регионысо толкынышто улшо ӱдыр-рвезе-шамычлан тӱрлӧ таҥасымашым эртараш верышт уке. Санденак «Юнармийын» регионысо пӧлкажым вуйлатыше верысе кучем тиде йодышым шотыш конда манын ӱшанен каласен.

Пайрем ужаш деч вара парашютист-влак, Российын, Марий Элын, «Юнармий» толкынын тистыжым кучен, самолёт гыч тӧрштеныт. Тыгак мероприятий жапыште тамле салтак пучымышымат тамлаш йӧн лийын. Тылеч посна лазертаг, альпийысе пырдыжыш кӱзымӧ, пикш ден арбалет гыч лӱйкалыме, радиосонар дене мастер-класс-влак лийыныт. Пилот деч посна чоҥештен кертше аппарат-влак дене пайдаланыме показательный выступлений ончыкталтын. Кумылан-шамыч «Ратник» салтак экипирокым чиеныт, тыгак кинологический службын пашаж дене палыме лийыныт, карт (изи машина) дене кудалыштыныт.

Л.ШАБДАРОВА.

М.Скобелевын фотожо.

Опубликовать в Одноклассники

Добавить комментарий