«Эреак 19…»
Шукерте огыл Волжск олаште воин-интернационалист, «Йошкар Шӱдыр» орден дене (колымекыже) палемдалтше Игорь Шестаковым (1967-1986) шарныме лӱмеш куштылго атлетике дене таҥасымаш эртаралтын.
Игорь Шестаков 1967 ий 30 апрельыште Волжск олаште шочын, 2-шо №-ан школышто тунемын. Рвезыж годым технический творчествылан кумылаҥын, тӱрлӧ спорт мероприятий, таҥасымаште вийжым терген. Лӱйкалымаш дене призёр радамыште лийын, а латкуд ияш гыч самбо дене пеҥгыде кылым кучен. Тыгак мотоцикл дене кудалыштын. Кандаш классым тунем лекмекыже чолга комсомолец 5-ше №-ан ГПТУ-шко тунемаш пурен. Сайын тунеммыжлан, ойыртемалтмыжлан, мер пашаш ушнымыжлан почётан грамотла дене палемдалтын. 1985 ийыште Волжскысо автошколышто (ДОСААФ-ыште) тунем лектын, «С» категориян водитель удостоверенийым налын.
1986 ий 8 ноябрьыште Совет Армий радамыш шогалын, юж десант войскаш логалын. Учебкым Ашхабадыште эртен. Игорь куанен канде беретым чиен. Варажым тудо Афганистаныште, разведбатальонышто служитлен. Тыге боевой илыш тӱҥалын: курыклаште рейд, душман-шамычын йолгорнылаштыже засаде, блок-постлаште дежурство… 1 декабрьыште черетан боевой заданийым шуктымыж годым нелын сусырген да 7 декабрьыште ӱмыр лугыч лийын. Патырлыкым да геройлыкым ончыктымыжлан колымыж деч вара «Йошкар шӱдыр» орден дене наградитленыт. Мотострелковый ротым лӱйкалыше тушманым чарен шогалтен, автомат дене кум огневой точкым пытарен. 1989 ий 12 апрельыште Волжскысо ик уремлан тудын лӱмжым пуэныт, 2-шо №ан школ пырдыжеш мемориал оҥам келыштареныт.
Таҥасымашке пошкудо Татарстан гычат кумылан еҥ-влак ушненыт. Стартыш чылаже 81 еҥ лектын.
Организатор-влак кокла гыч иктыжын В.Мартьяновын палемдымыж почеш, ийготым шотыш налын, участник-шамыч 1 да 5 километр кутышым куржын эртеныт. Изирак ийготан учстник-влак коклаште Памар села гыч Ксения Романова чемпион лийын. Смешанный эстафетыште (4х400 м.) икымше верыш Памар СОШ, кокымшыш Зеленодольск ола гыч «Каскад» команде, а кумшо верыш Шарача гыч «Шторм» команде-влак лектыныт. Военно-патриотический клуб-влак коклаште эн ончыко Зеленодольск гыч «Каскад» команде лектын. Кокымшым Купсола гыч «Клинок», кумшо верым Шарача гыч «Шторм» командыла налыныт.
Спорт мероприятийым эртарен колташ полшымыштлан предприниматель-шамыч Р.Биктимировлан, С.Исаевлан, О.Решетовалан, К.Снегуровалан, ВИТТ-ын директоржо Д.Серовлан таум ыштат.
Тыгай спорт мероприятийым ончыкшым йӱлаш пурташ шонат.
Е.Эшкинина.
