ТАЗАЛЫК

Ынде тӱвыра полатыштат ыштат

Марий Элыште у коронавирус инфекций деч вакцинаций умбакыже шуйна.
30 март йотке республикышкына Гам-КОВИД-Вак («Спутник-V») вакцинын 30792 дозыжым кондымо. Тудым регионысо поликлиникылашке шеледен колтымо. Тымарте 21952 еҥ у коронавирус инфекций деч прививкым ыштыктен.
Прививке кампанийым эшеат вияҥден колташ манын, Йошкар-Олаште вакцинацийым эртарыме куснылшо пункт-влакым почыныт. Мутлан, Сеҥымашын ХХХ идалыкше лӱмеш тӱвыра полатыште таче гыч 1-ше №-ан поликлиникын медицине бригадыже пашам ышта. Тудо COVID-19 деч аралалташ шонышо чыла еҥым 1, 2, 5, 6, 7 да 8 апрельыште 10 гыч 15 шагат йотке вакцинироватла. 12, 13, 14, 19, 20, 26 да 28 апрельыште тиде пунктыштак 2-шо №-ан поликлиникын медицине бигадыже пашам ышташ тӱҥалеш.
Тӱвыра полатыште верланыше прививкым ыштыме кабинетыш «Макдональдс» вечын служебный омса гыч пурыман.
Йошкар-Оласе 2-шо №-ан поликлинике шке зданийыштыже вакцинацийым эртарыме эше ик пунктым почын.
У коронавирус инфекций деч прививкым ыштыме лишыл пункт В.И.Ленин лӱмеш тӱвыра полатыштат почылтеш. Тушто 1-ше №-ан медсанчастьын бригадыже пашам ышташ тӱҥалеш.
Арня мучаш марте республикышкына COVID-19 деч вакцинын эше ик партийжым кондат.
Марий Элын Тазалыкым аралыме министерствыжын ушештарымыж почеш, препаратын кокымшо компонентшым колтымо деч кум арня эртымеке веле айдеме вакцинироватлалтшылан да у коронавирус инфекций деч аралалтшылан шотлалтеш – лачшымак тиде жапыште черлан иммунитет лектеш.
Тидымак шотыш налын, прививкым ыштыктыше-влаклан икымше да кокымшо компонент дене вакцинироватлалтме деч вара шуко еҥым иквереш чумырышо верлашке шуэнрак коштман, маскым чийыман, кидым чӱчкыдын мушман, социальный дистанцийым кучыман.

М.ИВАНОВА

Опубликовать в Одноклассники

Добавить комментарий