5 сентябрьыште Марий Эл Республикысе Марий юмыйӱла рӱдӧ ушемын тӱшка погынымашыже эртен. Тушко ушемыш пурышо общине-влакын еҥышт толыныт.
Погынымаште каҥашыме тӱҥ йодыш организацийын у вуйлатышыжым сайлыме дене кылдалтын. Тыгай ӱшаным онаеҥ-влак 44 ийыш тошкалше Александр Васильевич Бирюковлан ыштеныт. Тудо 2016 ий гыч юмыӱла ушемын «Марий кумалтыш» Йошкар-Оласе общиныжын пашаштыже чолгалыкым ончыкта. Республикысе Самырык театрын директоржылан ышта. Марий Эл Республикын сулло артистше чап лӱм дене палемдалтын. У вуйлатышылан кугурак ийготан онаеҥ-влак саламлыме мут дене пырля ятыр сай каҥашым, тыланымашым ойленыт.
Погынымаште моло тӱрлӧ йодышымат каҥашеныт. Мутлан, организацийын уставшын проектышкыже ятыр вашталтышым пуртеныт да тудым пеҥгыдемденыт. Лишыл жапыште документым у вуйлатышылан регистрироватлаш ӱшаненыт.
Октябрь тӱҥалтыште лийшаш Марий калык погынлан ямдылалтме йодышат тарваталтын. Вет тушто Марий юмыйӱла ушемын шкенжын секцийже пашам ышташ тӱҥалеш. Лач тушто каҥашышашлык йодыш-влакым пеҥгыдемденыт. Тыгак вес ийлан марий кечышот календарьым Пошкырт кундемысе Марий юмыйӱла рӱдӧ ушем дене пырля ямдылаш палемденыт.
Каласен кодыман, 28 августышто Башкортостан Республикыште, верысе икмыняр общине ушнен, шкеныштын Марий юмыйӱла рӱдӧ ушемыштым ыштеныт. Тудо официальный регистрацийымат эртен. Тидын шотыштак Марий Элысе Марий юмыйӱла рӱдӧ ушем Пошкырт кундемысе ты организаций вуйлатыше Г.П.Пастиевлан саламлымашым колтен.
Ушештараш кӱлеш, тачысе кечылан Марий Элыште 12, Пошкырт велне 6, Угарман кундемыште ик Марий юмыйӱла организаций регистрироватлалтын. Марий Элыште Марий юмыйӱла рӱдӧ ушем 2007 ийыште ышталтын.
С.НОСОВА
