СПОРТ

«Шӧртньым» налын

Ече дене Сыктывкарыште эртыше Российын первенствыштыже Марий Эл гыч Ярослав Егошин скиатлонышто «шӧртньӧ» медальым сеҥен налын.

Таҥасымаш 19 мартыште лийын. 17 ияш ечызе-влак коклаште 20 километрыште тренер Николай Кошкинын воспитанникше 69 участник  коклаште икымше верыш лектын. Палемдыман, Н.Кошкин идалык ончыч Йошкар-Оласе «Корта» ече базыште тренер сомылым шуктен, ечызе-влакым тренироватлен. Тўрлӧ амаллан кӧра Тюменьыш  пашам ышташ каен, пеленже воспитанникшымат налын.

Шӧртньӧ медаль деч ончыч Ярослав 10 километр кужытышто классик йӧн дене ший медальын озаже лийын да спорт мастер нормативым шуктен. Тыгак марий рвезе Тюмень областьын командыж дене, кокымшо этапым куржын, эстафетыште (4х5км) кокымшо верым налын. Коми сборный команде деч улыжат 1,8 секундлан почеш кодын. Тюмень областьлан эстафетыште Марий Эл гыч Константин Николаев (1-ше этап, УОР), Игорь Феофанов (4-ше этап), тыгак Артём Малышев куржыныт.

Тренер Н.Кошкинын палемдымыж почеш, ечызе-влак тыгай результатым шке регионлан ончыктен кертыт ыле.

Тиде старт тале ечызе, сай тренерат улмым эше ик гана пеҥгыдемден.

Е.Эшкинина.

Опубликовать в Одноклассники