УВЕР ЙОГЫН

Шым районыш лектын тергыме

«Мариэнергон» специалистше-влак республикыштына иканаште шым районышто электровийым закондымын кучылтмо ваштареш виктаралтше рейдым эртареныт.

250 утла специалист, тидын шотыштак вуйлатыше-влак, Медведево, Волжский, Курыкмарий, Звенигово, Морко, Советский да Юрино районлаште лийыныт. Тидын годым чыла лӱдыкшыдымылык мерым шотыш налыныт: маске ден перчаткым чиеныт, дезинфицироватлыше средствым кучылтыныт.

Рейд жапыште 6000 утла потребительын шотлышо приборлажым тергеныт, 14 тӱжем утла киловатт-шагат энергийым шотлыде кучылтмым рашемденыт. 800 тӱжем утла киловатт-шагат электровийым кучылтмаш чын ончыкталтын огыл, тушечын 50 тӱжем утла киловатт-шагатше шотлалтде кодын.

Шотлышо прибор-влакын пашашкышт закондымын шӱшкылтмӧ фактла шотышто мутым кучыкташ материалым правам аралыше органлашке пуымо.

«Рӱдӧ да Юл кундем Россеть Мариэнерго» директорын пашажым шуктышо Сергей Хлусов палемден: «Регионышто эпидемий дене кылдалтше неле ситуацийым ончыде, энергий йоммаш ваштареш кучедалмаш филиалын пашаштыже ик эн тӱҥ лийын кодеш. Компаний тыгай пашам умбакыже шуяш тӱҥалеш. Рейд-влак ончыкыжат эртаралтыт».

Ю.ИСАКОВ

Опубликовать в Одноклассники

Добавить комментарий