КАЛАСЕ, "МАРИЙ ЭЛ"

Шылтен огыт керт

Налог орган-влак ынде посна еҥ-шамычын банкыште аралалтше поянлыкышт нерген чыла уверым налын кертыт манын колынам. Тыгак мо?

А.Северцев.

Йошкар-Ола.

 Йодышлан Медведево районысо прокурорын полышкалышыже О.В.Бахтина вашештен:

– 2021 ий 17 февральыште РФ Налог кодексыш вашталтышым пуртымо нерген закон лектын. Тудо налог органлан физический лица-влакын банкысе тайныштым пален налаш йӧным почын.

Лачшымак РФ Налог кодексын 80-ше статьяшкыже вашталтыш пурен. Тудын почеш банк-влак клиент-шамычын паспорт копийыштым, окса средстве дене пайдаланаш пуымо доверенностьын копийыштым, тыгак счётым почмо ойпидышын да петырыме дене кылдалтше йодмашын копийыштым, тыгак кидпале образецан картычкыштым да печать оттискыштым налог орган-влаклан пуышаш улыт.

Федерал налог службо тыгак клиентын банкыш пуымо чыла документше дене палыме лийын кертеш.  Кредит организаций эртарыме операций-влак почеш эсогыл выгодоприобретатель-влакын лӱмыштымат налог орган-влаклан увертарышаш.  Налог орган гыч йодмаш пурмеке, кум кече жапыште тудо раш уверым пуышаш.

 

Пайдаланен кертам мо?

Пандемий жапыште предприниматель-влакын парымым шӧрымӧ шотышто рассрочкым пуымо  шотышто ала рашрак умылтареда ыле?

Н. Васильев.

 Медведево район.

Йодышлан Медведево районысо прокурорын алмаштышыже, юстиций советник А.А.Пекшеев вашештен:

– Пандемий жапыште эн чот туткарыш логалше экономике отрасль переченьыш пурышо изи да кокла бизнес субъект-влакын парымыштым кӱрын лукмо шотышто суд пунчал але моло органын актше-влак шотышто 2020 ий 12 декабрь гыч у закон вийым налын. Тыгай отрасль-влак перченьже 2020 ий апрельыште пеҥгыдемдалтын ыле.

Изи да кокла бизнесыште  ыштыше-влакын парымышт погынен гын, тидын деч вара тений 1 май марте суд-пристав исполнитель-влак службыш колтымо документ почеш исполнительный производство тарванен гын, парыман еҥ рассрочкым пуымо шотышто йодмашым возышаш ыле. Йодмаш пелен парымым шӧрен толмо график лийшаш (тудын кужытшым парыман еҥ шке палемдышаш, но шӧрымӧ пагыт 2021 ий 1 август марте гына лийын кертеш). Тидын годым парымын кугытшо 15 миллион теҥге деч утла лийшаш огыл.      

Рассрочкым  чыланыштланак огыт пу: панкрутыш лекме делам тарваташ мораторийым кӧн шотышто палемденыт, тыгак кӧн тазалыклан эҥгек ышталтмым шӧрымӧ, але тудым ончышыжо илыш гыч кайымылан эҥгек лиймеке, але моральный эҥгеклан компенсаций, выходной пособий,  паша ойпидыш почеш пашам ыштымылан да тыгак кӧн интеллектуальный паша лектышлан авторлан тӱлымӧ шотышто парымже погынен.

 

         Эҥгекын кугытшым кузе рашемдат?

Оҥай ыле пален налаш: южлан  эҥгекым ыштыме кугытым кузе рашемдат, поснак штрафым пуымо годым.

А.Виноградов

Светский район.

Йодышлан Медведево районысо прокурорын полышкалышыже О.В.Бахтина вашештен:

– Атмосфер южлан пӱртӱс среда компонент семын  эҥгекын кугытшым шотлен лукмо методикым тений 16 февральыште РФ Пӱртӱс поянлык да экологий министерствын приказше пеҥгыдемден. Пеҥгыдемдымеке, ты методике юрлица ден посна предприниматель-влакын пашам ыштыме объектлаште пӱртӱс средалан могай категориян эҥгекым ыштыме, тыгак стационар источник-влакын палемдыме норматив деч коч южыш луктын кышкыме веществан кугытыштымат шотыш налеш. Тӱҥ шотышто ты эҥгек кугытым сай да сай огыл метеорологий условийыште ончат, кунам юридический лица ден предприниматель-влак, кудыштын атмосфер южым амыртыше веществам лукшо источникышт улыт, РФ субъектын исполнительный кучемжын органже-влак  да регионысо кугыжаныш  экологий надзорын уполномоченныйже дене  мутланен келшымеке, южыш шагалрак лавыртыше веществам лукшаш. Но ты методике атмосферыш радиоактивный веществам лукмо дене ышталтме  энгекым ок ончо.  

Ты методикыштак атмосферлан эҥгекым ыштыме кугытым шотлен лукташ полшышо таксат палемдалтын. Но шке пашам шуктымо дене пырля атмосферылан эҥгекым ыштыше предприятийым кучымлан оксам тӱлымаш, юрлица ден предприниматель-влакын атомосферылан пӱртӱс средан компонентше семын эҥгекым ыштыме роскотым петырыме деч садак ок утаре.

 

С.Носова ямдылен.

Опубликовать в Одноклассники

Добавить комментарий