БИЗНЕС

Шурно пасу воктене… кӱэштме кочкыш

Шокшо кинде манатат, вигак аван ялысе коҥга гыч кӱэшт лукмо тутло пушан киндыжым шарналтет. Тудыжо йоча годым могай тамлын чучын! Кызытат олаште «Шокшо кинде» пекарне-кевыт воктеч эртышыла, тиде шарнымашак тушко пурен лекташ тарата. Олаште веле огыл, ял кундемыштат ынде тыгай кӱэштме цехан кевытым почедат.

Марий Турек посёлкын рӱдӧ уремже дене эмлымвер велым кудал эртыме годым корно тӱрыштак «Шокшо кинде» манын возымо пекарне-кевыт шинчалан перныш. Тушко пурлалаш пурымеке, пырдыж мучко сӱретлен шындыме шышталге тӱсан шурно пасу вигак кумылым савырыш. Тыгай сӱрет воктене тыгаяк тӱсан кӱэшт лукмо тамле когыльым шокшо чай дене тамлаш да корныш шокшо киндым налаш кӧлан ок келше?!

«Алексия» ООО-н директоржо Н.С.Морозован ойлымыж почеш, тиде пекарне-кевытым почаш алмаштышылан ыштыше эргыже Александр Харитонович темлен. Фирмыште тудо технический йодышлан вуйын шога. Ты зданийжым тоштым налме гын, олмыктен уэмдыме да цехым оборудоватлыме пашамат тӱрыснек тудо виктарен.

Адакше Нина Сергеевна шкежат тыгай шонымашым шукертсек кӧргыштыжӧ кучен. Кугу Карлыган ялыште пекарньышт уло гын, район мучко шке кевытыштлан киндым тудак ситарен шога, моло кочкышымат тушто кӱэшт луктыт. Пекарне воктенак кевытыштышт шокшо киндымат ужалат. Но моло вере намиен шуктымешкышт тудо садыгак йӱкша. Сандене  район рӱдыштӧ кызытсе жаплан келшыше пекарне-кевытым почаш кӱлешак, каласен ыле фирме вуйлатыше. Теве ынде шонымашышт шукталте.

9 Май пайрем кечын тудо омсажым почо. Калык шуко погынен ыле, каласыш пекарне-кевыт вуйлатыше Е.Е.Ложкина. Елена Еремеевна тылеч ончыч «Алексия» кевытыште кочкыш продукт отдел вуйлатышылан да кевытчылан лу ий ыштен. Нина Сергеевнан у пашам темлымекыже, тудо келшыде кертын огыл, вет образованийже денат – кондитер. Пурымына кечын эше тушто верысе техникумышто повар-кондитерлан тунемше практикант-влак киндым кӱэшташ руашым формылашке оптат ыле. Июньышто дипломым аралымеке, тышкак пашам ышташ толаш шонымышт нерген ойлышт. Чулым улыт, мане кевыт вуйлатыше да шкежат нунын дене пырля пашалан пиже.

— Нина Сергеевна дене пашам ышташ мылам келша, — ешарыш Елена Еремеевна. – Тудо поро кумылан оза. Моло гай торжа огыл. Кутырен келшашат лиеш. Пашаланат чонжо йӱла. Калык утларак толжо, кӱэштме кочкыш шулдырак лийже манын, продуктымат шулдынрак кондаш тырша. Сандене налше эре гаяк уло. Ме тыште уржа да шыдаҥ киндым, перемеч ден когыльым да моло тӱрлӧ кочкышым кӱэшт ужалена. Толмыда годым пурен-налын лекташ ида мондо.

Тыге манмыже мыланна келшыш веле. Адакше шышталге тӱсан шурно пасу сӱретат тыгаяк тӱсан кӱэштме кочкышым тамлаш уэш толаш ӱжӧ.

Юрий Исаков.

Снимкылаште: «Шокшо кинде» пекарне-кевыт; кевыт вуйлатыше Е.Ложкина; повар-кондитер практикант-влак А.Плотникова ден М.Веткина; тыгай сӱрет воктене кочкышыжат тамлырак.

Авторын фотожо.

 

 

Опубликовать в Одноклассники

Добавить комментарий