БИЗНЕС

«Шагал, но кычалаш перна…»

Пеллет нерген шукынжо колыныт докан. А вет тудым мемнан дене лу ий утла ончыч гына ышташ тӱҥалыныт, да ик эн ончыч – Советский район Алексеевский посёлкышто. Ты пашам виктарен колтышыжо – Анатолий Георгиевич Милютин, ача, вуйын шогышыжо – Владимир Анатольевич, эрге. Тӱҥалынже, мутат уке, ача, но пашажлан, ойлымыж почеш, эргыж дене пижыныт – 2008 ийыште.

Тылеч ончыч Анатолий Георгиевич «Каинск» фирмын пашажым тыгак виктарен, а вуйын шогышыжо адакат ончычсо пелашыже Лидия Павловна лийын. Йошкар-Оласе Мир уремыште верланыше да чоҥымо материалым ужалыше «Стимул» кевытыштым шарнеда? Коло ий наре тудо пашам ыштен. Тӱҥалтыште парышым конден. А вара, воктенак моло тыгай кевыт – «Еврокомфорт», «Мегастрой» — почылтмеке, парыш толмым чарнен, да петыраш гына кодын.

Ончычсо семынак олаште иленыт гынат, бизнесыштым районыш кусараш келшеныт. Но кевытым огыл, а у производствым почаш шонен пыштеныт, республикыште — ик эн ончыч.

— Санкт-Петербург гыч палымем-влак у пашалан пижаш темленыт. Идалык утла мый тӱрлӧ вере оборудованийым кычальым, Москвасе выставкышкат миен коштым. Да чыла ужмо, шымлыме негызеш шке ыштыкташ шонымаш шочо. Йошкар-Оласе «МарийАгромаш» фирмыш миен, тусо конструктор дене пырля проектым ыштышна, да туштак оборудованийым ямдылышт, — каласыш Анатолий Георгиевич.

— Молан лачак Алексеевский посёлкышто производствым почаш шонен пыштенда? – оҥайын чучо.

— Тыште корно воктенак ончычсо пилорам деч кодшо оралте ден вер келшышт. Адакше тораштак огыл, Советский посёлкышто, пушеҥгым обрабатыватлыше цех-влак шукын ыльыч. Тӱҥалтыште пилашӱкымат нуно шкеак конден пуэныт – перерабатыватле гына. А кызыт тусо 12 цех гыч улыжат икте пашам ышта, да эше икте – Михайловка ялыште. Тетла пилашӱкшымат нигушто налаш, ола гыч шупшыктена. А тора гыч кондаш пайдале огыл, — ӧпкежым почо пашам виктарыше.

— Пилашӱк шуко улмо годым тушеч ямдылыме пеллетшым куш колтенда? – палыме шуо.

— Тӱҥалтыште налшым муаш куштылго огыл ыле. Торашке колташ логалын – Краснодарыш. Кызытат тӱҥ налшыже туштак. Тыгодымак тембалныракат, Самарыште, мутлан, налшым кычалына. Шкенан денат частник-влак кучылташ тӱҥалыныт — производствыштышт пеллет дене ыштыше котёлым шынденыт. Ме шкежат тудын дене пайдаланена, — вашештыш тудо, да ырыкташ котельныйыш пурымеке ешарыш: — Мландышӱйым олтымо гай лавырам тыште огыда уж. Газ дечат пайдале ты топливе, вет содыки шӱк гыч ышталтеш. Пилашӱкшым муаш гына ынде йӧсӧ лийын.

— Тугеже олалан гына ӱшанаш кодеш? – йоддежат ыш лий.

— Олаштыжат мемнан гай ик цех пашам ыштымым чарныш. Туштат сырьём ончычсо наре от му. Вет мыланна пилорамысе гай вӱдыжгӧ пилашӱк ок йӧрӧ, а вагонкым да монь ыштыше столяр цехысе гай кукшо кӱлеш. А тыгайышт туштат икте веле огыл петырнен, — рашемдыш Анатолий Георгиевич.

Мутланыме жапыште эргат, Владимир Анатольевич, толын шуо. Ойлымыж почеш, ты пашалан пижмыж деч ончыч тудо МарГТУ-н механико-машиностроительный факультетыштыже тунемын. Предприниматель сомылым шке ӱмбакыже налаш ачан темлымеке, эрге ӧрын шоген огыл, кумылын келшен. Тачат тидлан ок ӧпкеле. Нелылык лектын гынат, ӱшаным ок йомдаре:

— Кызыт сырьёна шагал, но кычалаш тӱҥалына. Тора гыч шупшыкташ роскот кугу гынат, кызытеш вес йӧн уке. Тӱҥжӧ – сатуланна йодмаш уло. Тидыжак пашалан кумылым ешара.

Сырьё ситыдымылан кӧра продукцийым лукмаш кок пачаш иземын гынат, тыште пашаеҥым шагалемдаш огыт шоно – ончычсо семынак кандаш еҥ тырша. Нуно утларакше Советский посёлко гыч улыт. Алексеевский посёлкышто гын ышташ кумыланым муаш поснак йӧсӧ лийын. Санденат дыр тыште пашаеҥым арален кодаш кӱлешлан шотлат. Теве изак-шоляк Охотниковмыт, бригадир Юрий Алексеевич ден оператор Владимир Алексеевич, ты цехыште тӱҥалтыш гычак пашам ыштат. Уста специалист-влакым кузе от переге. Адакше посёлкышто тыгай вес производствыжо укеат. Ты шот гычат тудо ял шотан илемлан кӱлешан – ешартыш паша верым да спонсор полышым пуышо семын. Сандене ача ден эрге Милютинмытын верысе производствым арален кодаш тыршымыштым сай велым аклыде ок лий.

Юрий ИСАКОВ

Авторын фотожо

Опубликовать в Одноклассники

Добавить комментарий