БИЗНЕС

Иктыште – кевыт, весыште – цех

Азап лийшашым палем ыле гын, шекланем ыле, маныт. Но тидым нигӧ пален ок керт. А вет тидлан кӧрак ветеринар врач инвалидыш, вара… индивидуальный предпринимательыш савырнен. Мутат уке, таклан огыл, а нелылык ончылан сукалтыдымыжлан кӧра.

Озаҥысе ветеринар институтым тунем пытарыме деч вара самырык специалист, Надежда Михайловна, ончыч шочмо кундемыштыже, Чувашийысе ик озанлыкыште, пашам ыштен. Вара кодшо курымысо 80-ше ийла мучаште Марий Элысе Михайловко кундемыш марлан толын да «Михайловский» опытно-производственный озанлыкыште ветучасткым вуйлаташ тӱҥалын, ветеринар врачлан ыштен.

Но пашаште вучыдымо азап лийын каен, да кугу эҥгекыш логалын — шинчаже начарын ужаш тӱҥалын. Но мом-гынат ышташ кӱлын, вет самырык мӧҥгыштӧ яра шинчен ок чыте.

— Акам, ачамын шӱжарже Фекла Степановна Столярова, пеш уста ургызо ыле, санденак ты пашалан предприниматель семын пижаш темлыш. Шкеже пенсийыште лийын гынат, полшаш сӧрыш. Ургымо цехым почмыланна 15 ий темеш гын, тудо пытартыш кечылаж марте кертмыж семын мыланна ургыш. Конешне, цехыште огыл, мӧҥгыштыжӧ. Ургыш веле огыл, ургызына-влакым шукылан туныктыш. Шукерте огыл илыш дене чеверласыш, кийыме верже пушкыдо лийже, — чаманыме семын каласыш предприниматель Н.Хакимова.

Адакше тыгай пашалан пижаш вес амалат лийын. Тысе опытно-производственный озанлык пеш шуко, 12 тӱжем вуй наре, сай урлак шорыкым ашнен. Коваштыжым туштак ийленыт да ужгам ургеныт. Ургымо цехшат кугу лийын, но пужен ыштыме 90-ше ийлаште чыла пытен. Озанлык вуйлатыше Леонид Ксенофонтович Бабин ончычсо ветеринар врачлан цехысе ургымо машиналам шулдо ак дене налаш темлен. Тыге Надежда Михайловна почто зданийыште пӧлемлам арендыш налын да 2005 ийыште цехым почын.

— Материалым шулашыжат профессионал закройщицым, Светлана Николаевна Савченком, ӱжым. Ургызат шке пашажым палыше ыле. Кок еҥ дене тӱҥалме да изин-изин кушкын толмо. Арендылан оксам тӱлен кияш огыл манын, Михайловкыштак мландым налме, шкан цехым чоҥымо. Тиде 2008 ийыште лийын. Йӧра, кризис тӱҥалме жаплан тудым нӧлтен шуктымо. Зданийын ик пелыштыже кевытым, весыштыже производствым почна. А шыгыр лиймеке, цехлан воктенак, шеҥгелныла, ешарен чоҥышна. Ургымо дене пырляк торгайыме пашам вияҥден колтышна. Тыште веле огыл, Советский ден Солнечный посёлкыласе арендыш налме верлаште кевытлам почмо. Верлашке лектеденат ужалкалена. Водительге шотлымаште латвизытын чыла тиде пашам ыштена. Мый вуйлатыше семын  виктарен шогем, а бухгалтер, документ да торгайыме сомылым полышкалышем Ольга Юрьевна Моторова шукта, — рашемдыш предприниматель.

Ургымо цехыш пурен ончална. Паша шолеш ыле – заказ шуко, маньыч. Чумыр ургымо гыч 30 процентше йодмо почеш шукталтеш. Еҥ-влак, тышке толынат, верыш лектын торгайыше дене вашлийшылат, заказым ыштат. Уым веле огыл ургыктат, тоштымат олмыкташ кондат: кушто кӱчыкемдаш, кушто тӧрлаш, кушто замокым вашталташ кӱлеш. Оласе дене таҥастарымаште тыгай пашам тыште палынак шулдын ыштат. Йодмо почеш веле огыл, тыглай ужалашат калыклан кӱлшӧ сатум – футболкым, майкым, халатым – ургат. Надежда Михайловна урген ямдылыме вургемлам ончыктыш гын, пеш сӧралын койыт. Налашат кумыл лекте.

Юрий ИСАКОВ

Авторын фотожо

Опубликовать в Одноклассники

Добавить комментарий