Медведево районысо рӱдӧ больницыште эндоскопический шымлымашым эртарыме кабинет-влакым тӱрыснек олмыктымо да медицине, технический оборудованийла дене шыҥдарыме.
Кызытсе жаплан келшыше у оборудований кокла гыч сай велым поснак видеоэндоскопический системым палемдыман. Тушто видеогастроскоп, видеобронхоскоп, системный видеорӱдер, осветитель, приборный пластик стойко, медицине монитор улыт.
У оборудований специалист-влаклан бронхоскопийым, колоноскопийым да фиброгастроскопийым палынак келгын эртараш, раш диагнозым шындаш полшымо шотышто ончыл эндоскопий да компьютер технологийым иктыш ушен.
Видеостойко пациент-шамычлан амбулаторий-поликлинике да стационар условийлаште медицине полышым пуымо годым шымлымашым жапыштыже эртараш да шуко черым вияҥаш тӱҥалме йыжыҥыште рашемдаш, тыгак нуным чын да писын эмлыме йӧным муаш полша.
М.ИВАНОВА