УВЕР ЙОГЫН

Шуко ача-аван шонымашыже шукталтын

Кушкыжмын, 22 январьыште, Марий Эл вуйлатыше Александр Евстифеев Медведево районысо Знаменский поселкышто у йочасадым почын.

Тиде тыглай садик гына огыл, а 1,5 гыч 4 ияш марте икшыве-влакым  вияҥдыме кызытсе жаплан келшыше рӱдер.

— 2019 ийым у йочасадым почмо гыч тӱҥалме – сай пале. Тыште у проектым кучылтмо, коммунальный сетьым ыштыме, оборудованийым налме, у педколлективым чумырымо. Ты проект Россий Федерацийын Чоҥымаш министерствыжын экономически пайдале проектше-влак реестрыш пурталтын. Тидыже федеральный бюджет гыч 73,5 миллион теҥгем налаш да ты оралтым чоҥаш йӧным пуэн, — йочасадым чоҥышо, ача-ава ден икшыве, Знаменский поселкышто илыше-влакым саламлышыжла палемден Александр Евстифеев.

У садикым почмо дене шуко ача-ава куанен, вет шонымашышт шукталтын. Марий Эл вуйлатыше палемден: йоча дошкольный учрежденийлашке черет ынже лий манын республикын правительствыже ​чот тырша. Мутлан, ӱмаште гына 600 ешартыш веран 5 садикым почмо.

— Паша умбакыже шуйна. Кызыт эше вич дошкольный учреждений чоҥалтеш. Нуным ме тенияк почаш шонена. Тидым шукташ мыланна эл вуйлатыше-влак чот полшат. 2018 ий майыште Россий Президент Владимир Путинын пеҥгыдемдыме национальный проект-влак дене келшышын, республиклан федеральный бюджет гыч 1,8 миллиард теҥге ойыралтеш. Тидыже школыш кошташ шудымо ньога-влаклан 2600 ешартыш верым ышташ да 2021 ий марте 3 ияш марте икшыве-шамычлан верым тӱрыс ситараш полша, — каласен Александр Евстифеев.

Знаменский поселкышто «Василёк» йочасадым почаш 80 млн. теҥге ойыралтын. Садикын тӱрыс кумдыкшо – 2000 утла квадрат метр. Тушто физкультурный да музыкальный зал-влак, медицине блок, методкабинет, 5 группылан малыме да модаш келыштарыме пӧлем-шамыч, кызытсе жаплан келшыше пищеблок улыт.

Медведево район администраций вуйлатыше-влакын ойлымышт почеш, Знаменский поселкышто у йочасадым почмо дене тиде ял шотан илемыште 2 ияш да тылеч кугурак ийготан-влаклан верым 100 процентлан ситарыме, палдара Марий Эл Республик вуйлатышын организаций да аналитике виктемже.

Л.Камалетдинова.

Опубликовать в Одноклассники

Добавить комментарий